塵世間，試問仲有邊個阻到Stephen Curry入球？今屆一開季已經着晒火，就喺啱啱勇士作客對灰熊嘅常規賽上，兩次喺中場遠射得手，太屈機了吧！到底「咖喱」喺開季前做過乜嘢特訓，筆者真係唔知，不過Under Armour肯肯定係「加辣」嘅原因之一，事關Curry由開季到依家，都着緊UA幫佢全新炮製嘅Curry 2，加強火力之餘，仲幾乎場場有新配色登場，例如對湖人時着灰色嘅「Iron Sharpens Iron」，對帝皇時就着紅色嘅「Floor General」；其實Curry喺比賽之前，會唔會為咗選擇鞋款而費煞思量呢？

雖然今屆NBA打咗唔夠一個月，但Curry 2已經有多款配色登場，例如早前勇士對金塊嘅比賽上，「咖喱」就着咗紅色嘅Floor General上陣。

外線球員專屬

原來早喺開季之前，「咖喱」已經着住Curry 2練波，佢對新拍檔有此評語︰「我整個夏季都着住佢練波，佢嘅設計與實戰表現，都令我覺得好興奮。」而負責運動鞋設計嘅UA副總裁Dave Dombrow亦言︰「Curry 2可以畀到Stephen極大嘅運動自由度，以及出色嘅緩震與穩定表現。」到底Curry 2有何厲害設計？首先中底用咗全掌式Charged Cushioning泡棉，令整片腳掌都有緩震保護，筆者都試着過，觸地感覺唔似其他對手咁軟，但係反應更快更實在，更加切合Curry呢類外線球員嘅打法。至於鞋面構造就由上一代嘅AnaFoam變成SpeedForm，質地更加柔軟、貼腳，令Curry更易走動之餘，SpeedForm表面仲滿布透氣孔，唔似AnaFoam咁焗腳。

新色故事懶人包

但凡Signature Shoe，總會有唔同顏色版本推出，Curry 2都唔例外，而且並非單純轉色咁簡單，而係每款顏色都有一個小故事，例如喺9月率先開售嘅紫藍色「Dub Nation」及灰色「Iron Sharpens Iron」，前者係金州勇士嘅代表顏色，後者源自聖經箴言27章17節︰「As iron sharpens iron, so one person sharpens another」，所以用灰色代表鋼鐵。至於最近加推嘅四款新顏色，又有乜嘢古講？今次就以懶人包形式，逐一Show Off話你知。

Floor General $1,299（發售中）

專為紀念退伍軍人節而設，鞋身以紅色為主，結合埋海軍藍及純白色，正正係美國國旗嘅三種代表顏色，而鞋舌背面嘅五星圖案，代表咗五星上將，既係軍人嘅最高殊榮，亦說明咗Curry喺球隊嘅代表性。

The Professional $1,299（本月20日開售）

大家有冇諗過，其實Curry同占士邦都有幾分似，平時收收埋埋睇準機會，一旦出手，例不虛發。UA嘅設計師就從007身上得到靈感，設計出黑色嘅低調鞋身之餘，鞋舌背後就有007電影開首嘅膛線圖案。

Father to Son $1,299（發售中）

Stephen Curry出身籃球世家，爸爸Dell Curry亦係NBA名將，巔峰時期効力黃蜂，UA就用咗代表黃蜂嘅深藍與湖水藍雙色設計，炮製出「Father to Son」，向Dell致敬之餘，亦道出虎父無犬子嘅道理。

Long Shot $1,299（本月25日開售）

Curry嘅遠射唔只準，而且起手極快，令對手好難判斷，就好似長程導彈一樣，防不勝防。喺唔少大殺傷力武器上面，都有黃黑雙色嘅警示圖案，Long Shot就用上呢兩種鮮明配色，事先向Curry嘅對手預警。

文︰Dick　攝︰Homan

查詢︰2618 6722（中環擺花街38號Under Armour）