正所謂「男人愛高達，女人唔明白」，其實絲打們唔明嘅，又何只高達？好似荷里活科幻神獸Predator，相信個個女生見到都會嫌核突，偏偏造型愈猙獰、愈兇殘，巴打就愈鍾意。正如喺《AVP》尾段現身嘅Elder Predator，雖然出場時間只有短短分幾鐘，但係Big Boss嘅王者氣派，已經吸引到唔少Predator粉絲，依家Hot Toys與Joseph Tsang就將Elder Predator以1:6比例實體化出嚟，令原本短短分幾鐘嘅威風長存下去。

唔只Figure主體，Parts都講求高度還原，長矛就跟足美指設計，可以伸長縮短。

雖然短劍並非金屬製品，但係透過具金屬感嘅塗裝，都展現到疑似金屬嘅質感。

裝喺前臂嘅刺刀備有長中短三款，每款一對，全部都係合金製品。

面罩塗裝充滿舊化Feel，並且畫上咒文及吊飾點綴。

隨盒附有六款造型手掌，皮膚塗裝仲有爬蟲類嗰種滑潺潺嘅視覺效果。

Joseph Tsang坦言製作Elder Predator最困難嘅地方，係頭頂嘅皮膚紋理，每次發現與頭形比例有衝突時，都要將成個組件重新雕過，大大話話做咗五、六次之多。

辮子頭以軟膠製成，每條嘅塗裝與組裝都係人手製作，認真度可想而知。

HT MMS327 Stan Lee
預訂價︰$1,230
推出日期︰明年第二至第三季

頭頂雕工　試完又試

Figure造型師唔係韓國人嘅專利，高手，香港都有，但凡Predator Figure嘅玩家，有邊個唔識Joseph Tsang？佢同HT合作炮製過多款Predator，繼去年嘅《AVP》Ancient Predator之後，最近就有Elder Predator登場，有晒經驗，照計今次Easy Job啦，點知Joseph話有苦自己知，他說︰「其實Predator嘅玩家有好高要求，唔只頭雕，甚至整個Figure嘅每個細節，都要求準確還原，所以我哋喺Reference方面做咗好多準備工夫，務求喺比例、細節都忠於原著，未計上網及睇參考書，今次因為做Elder Predator，佢喺《AVP》尾段出場嗰段，我睇咗30幾、40次。」就算做足Reference功課，都唔代表製作時可以一剔過，Joseph補充說︰「最困難係頭頂嘅皮膚雕工，表面有好多凹凹凸凸，類似鱗片嘅Texture。當我完成咗頭頂嘅初模，認為比例準確時，就會落刀雕埋呢啲Texture，之後又會覺得比例未夠準，結果就要重新嚟過，如是者大大話話雕咗五、六次。」

落足眼力　眼神有變

製作認真唔只喺雕工方面，塗裝同樣出色，長矛、短劍以至盔甲都做足金屬塗裝，至於外露嘅皮膚部分就有一層滑潺潺嘅Coating，加強Predator嘅野獸Feel，更易令人將佢同大蜥蜴聯想埋一齊；雙目塗裝更加考功夫，唔只細膩，仲要連戲，Joseph解畫說︰「睇番《Predator》第一、二集，當中Predator嘅眼神，尤其是瞳孔部分都會傾向原始獸性一面，至於《AVP》就有少少分別，眼神變得擬人化。」諗住去Secret Base睇實物嘅粉絲，記住多加留意。附件方面，除有上述提及嘅武器，仲有三把裝喺前臂裝甲嘅合金製刺刀，以及同類之中少有嘅大斗篷，加埋做足舊化塗裝嘅面罩，不過為免令頭雕以至長髮Parts喺裝嵌之中造成破損，故此面罩純屬道具一件，笠唔到上頭，玩家收貨時，千祈咪亂試。

HT MMS325 《AVP》 1:6 Elder Predator

預訂價：$1,530

推出日期：明年第二至第三季

銷售點：旺角彌敦道582-592號信和中心20樓Secret Base

查詢：3722 3988

Facebook：www.facebook.com/hottoyssecretbase

萬民景仰　美漫老頑童

繼Iron Man、Hulk、Spider-Man及Thor等Super Hero之後，又有英雄人物登陸HT行列，仲要比以上例子更加顯赫？佢就係以上角色嘅原創者、被譽為「美國漫畫英雄之父」嘅Stan Lee囉！HT啱啱宣布1:6 Stan Lee開訂，由JC. Hong與Woo Chul, Ji合製嘅頭雕，傳神重現大師嘅招牌式幽默表情，造型方面選擇咗便服Look，仲有印上Stan Lee之名嘅導演椅，以及大師最鍾意對住記者示範嘅Spider-Man手勢Parts，活現老頑童本色。

＊圖片所示乃屬產品原型，與正式推出版本或有少許分別。

文︰Dick（產品圖片由Hot Toys提供）