「菜迷」想入坑玩《Macross》玩具，冇番一定財力支援都幾難成事，事關由以前Yamato至現在Arcadia出品，每款1:60韋基利講緊都係逾千元起標，還好Bandai終於肯造福人群，重推低價位嘅「Hi-Metal R」系列，以金屬關節補強做噱頭，一改舊版手軟腳軟嘅毛病，首款機體係1:100 VF-1J Armored Valkyrie，大約$780就有交易，菜迷入貨都冇咁肉赤。

Hi-Metal R VF-1J Armored Valkyrie Macross : Do You Remember Love ?
售價：約$780

膊頭、胸口及小腿都布滿導彈匣，重現全彈齊射嘅一幕。

Hi-Metal R傳神重現動畫中VF-1J重甲上身、全彈齊射嘅一幕，仲要$780有交易，入得過。

駕駛艙內有一條輝嘅同比例Figure，塗裝都算細心。

Bandai推出Hi-Metal R可謂誠意十足，整埋專屬官網做詳細介紹，有冇入手嘅菜迷都要上去睇睇！
網址︰tamashii.jp/special/hi-metal_r/

大腿設有拉出式關節，增加雙腳嘅可動範圍。

機身布滿線位，可惜就與同廠嘅Robot魂一樣，滲線工夫欠奉，高要求嘅玩家惟有自己出手了。

Gerwalk Mode半人形模式之下，雙腿擺到招牌「外八字」，抵讚！

除咗招牌式嘅三段變形，亦可做到雙手未展開嘅垂直升降形態。

延續Hi-Metal嘅變形方式，不過受力關節換成金屬物料，實淨得多。

Fighter Mode可更換主翼懸掛三連裝導彈，又可加裝起落架，變成待機狀態。

Hi-Metal R VF-1S Strike Valkyrie（Hikaru Ichijyou Model）Macross : Do You Remember Love ?
建議零售價：¥8,800（下月推出）

Hi-Metal R Tactical Pod Regult
建議零售價：¥6,800（明年二月推出）

金屬關節重點補強

Hi-Metal並非新系列，早喺2010年已經推出，當中有唔少元祖《Macross》機款，透過小量換件方式，重現VF-1嘅Fighter、Gerwalk及Battroid三段變形，不過膠製骨架過於單薄，唔只變形時一步一驚心，擺甫士又會手軟腳軟。Hi-Metal R就對症下藥，喺兩大受力位，即係主體膊頭以及連接雙腳嘅內藏骨架換成金屬物料，手腳扭動當堂紮實好多，仲有背部主翼輕微縮短，減少對大腿擺動造成阻礙。至於變形方式不變，留意揭起機頭扳向後時，要小心摺好頭部嘅機炮，另外手臂對摺時注意膠製滑動機關，畀多少少耐性，千祈咪用蠻力扯落嚟，否則後果自負。

全彈發射忠實重現

唔只實淨咗，Hi-Metal R VF-1J嘅另一重要賣點，係隨盒附設強化火力裝甲，如果之前Arcadia所出嘅1:60價位太高，粉絲唔捨得入手嘅話，Hi-Metal R正好讓你如願。後者嘅裝甲由27件組件構成，組裝步驟唔算複雜，例如前臂及小腿裝甲要先解體，之後圍繞機身重新裝嵌而已。此外，膊頭、胸口、小腿外側及腳肚都有開合式嘅導彈匣，重現全彈發射嘅姿勢，又可透過換件拆走部分導彈，變成發射後嘅空匣狀態。再者，Hi-Metal R VF-1J嘅比例都算拿捏準確，尤其是着甲後，機體明顯厚咗、大隻咗，Show到VF-1系列少有嘅重裝一面。

雞腳二月殺到

上次Hi-Metal《Macross》爛尾收場，今次Hi-Metal R就要打翻身仗，唔只有VF-1J Armored Valkyrie打頭陣，早前日本舉行嘅「超時空超合金展」，仲Show咗唔少參考作品大晒冷，下個月就有主角一條輝後期所揸、繼承福卡遺志嘅VF-1S連「寶貝鴨」背包，隨盒跟埋新製嘅敬禮造型手掌；明年二月仲會破天荒推出敵軍嘅量產機、俗稱「雞腳」嘅二足步行機體Regult，全高約190mm，可以揭開背脊睇到駕駛艙內構，買夠三隻，就可以重演動畫中圍揪VF-1J Armored Valkyrie嘅經典一幕。

查詢：2148 9483（精品）

文：Alfred　攝：Paul