女車神試JCW︰最愛Kart仔Feel

作為一位專寫車稿嘅女記者，喺一班姊妹Friend之中，小妹對車嘅認識的確係會多啲，講起車經都難免會牙擦啲，不過喺Wings面前，筆者都要收斂番啲，Who's Wings？就係女車神鄧穎詩囉！今次有幸請到佢試MINI John Cooper Works（簡稱JCW），睇睇連方程式賽車都揸得掂嘅Wings，如何評價呢款最跑得嘅MINI呢？

試車過後，Wings指出JCW重心低、懸掛短，駕駛感受好有Go-Kart Feel，即使車速再高，車身依然穩定。

2.0L直四TwinPower Turbo引擎嘅扭力高達32.6kgm，起步、加速當然好力。

車速刻度過咗200km/h，旁邊有黑白格仔旗點綴。

MINI Radio Visual Boost屏幕嘅圓形框邊，追加JCW嘅獨有裝飾。

由於尾翼中間設有凹位，揭起尾門都唔會壓住天線，Wings大讚呢個設計夠細心。

小尾翼加上中置雙尾喉，就連車尾都跑格過人。

Wings大讚前排嘅JCW Dinamica椅，承托力與包裹力都有高水準表現。

車迷身份始終未變過

身為車迷，邊個唔想有朝一日可以做賽車運動員，如果實現夢想嘅舞台，仲係方程式賽車嘅話，滿足感肯定大過中六合彩！細細個已經成為車迷，喺小型賽車場練得一身好本領，視拉哥倫（Kimi Raikkonen）為偶象嘅Wings，17歲就獲得歐洲車隊邀請加盟，成為全球首位歐洲F3000女車手，同年又參加澳門大賽車嘅「亞洲雷諾方程式」賽事，被譽為「女版舒麥加」。其後Wings喺新聞系畢業，做過ESPN體育記者，依家喺商界發展之餘，並且已為人母，育有一子一女。雖然暫別賽車場，但係Wings笑言自己仲係車手，平時除咗返工見客，又要接送仔女返學放學，她笑說︰「我五歲個仔有時會同我講『媽咪，快啲過咗架巴士啦……好嘢，媽咪你過咗佢喇』，跟住妹妹就會拍掌。」估唔到年輕時嘅賽車手生涯，會成為今日氹仔女開心嘅招數。

內外跑味重燃戰意

貪靚係女士嘅天性，唔只對自己，Wings對車嘅外在美都好講究，佢對MINI JCW又有何意見？她說︰「其實MINI JCW嘅內內外外都好有跑格，性能比歷代任何一款MINI型號都強，仲喺蒙地卡羅拉力賽贏過，我一早已經好想試。車身裝晒由JCW設計嘅Aerodynamic Kit，鬼面罩連入氣口都有蜂巢網隔，可以幫手減低風阻，而且加埋紅唇線，令跑味更突出。我最鍾意係車尾預留咗小凹位畀尾翼，打開尾門時唔會壓住天線，夠細心。」車廂布局又如何？Wings續說：「顯示屏幕與唔同顏色嘅氣氛燈都好夾，好有格調，我又好鍾意大屏幕嘅圓形飾邊，又有賽車嘅黑白格仔旗圖案做裝飾，車速錶嘅200km/h或以上刻度，就有黑白格仔圖案，好有落場Feel。」

外在美Pass，性能表現又如何？試車過後Wings表示︰「起步時揀咗Sport Mode，波箱同引擎反應都好敏銳，尾喉聲又夠響，幾有落場Feel。至於操控能力亦相當好，雖然車仔細細，起步都有貼背感覺，加速好快；轉向方面比以前輕，揸上手好舒服，尤其是加咗意大利名廠Brembo煞車系統，煞車明顯敏感度高左、夠力咗，反應又快又直接，一踩迫力，就可以喺短距離內煞停部車。整體嚟講，成部車都好有Go-Kart Feel，做到Direct Steering，Handling亦都好好，夠精準。」Wings講到JCW咁好玩，會唔會再度激發佢嘅賽車細胞，心思思復出呢？對此相信唔少香港車迷都會畀Like，Wings不妨好好考慮。