旗艦出爐 Meizu PRO5

國產手機市場近年競爭超激烈，自2012年開始推出手機嘅Meizu（魅族）就話要將旗下手機系列重新執位，以應對需求；仲喺上個星期於北京推出全新嘅PRO系列，成為品牌最頂級產品線。當中新機PRO5就用金屬機身，配備八核心處理器、2,116萬像素鏡頭等強勁硬件，內地定價最平2,799人仔、折合約$3,412有交易，即管睇睇呢部新鮮出爐嘅PRO5可唔可以幫Meizu嚟個大翻身！

前置鏡頭有500萬像素，機面下方為mTouch 2.1指紋辨識器，指紋認證過程快而準。
￥2,799 （32GB）、￥3,099 （64GB）

用上全金屬機背，手感唔錯。鏡頭下方加入雙色LED補光燈，打燈效果好自然。

改用USB Type-C插口，依家市面上相關配件唔多，充電線都唔易搵。

支援中港3G、4G制式，不過記憶卡同SIM 2唔可以同時擺放，二擇其一。

內置一系列手勢功能，鎖屏時畫上不同圖案就可以開啟指定功能。

備有《畫板》功能，畫畫、記事都得。

跑分高達73,000分，即時登頂，足證效能有幾強！

金屬機身好Feel

睇番Meizu嘅手機Line-up，主要分為平價嘅魅藍系列，以及原有嘅MX系列。後者除咗有MX4、MX5等機款之外，仲有MX4 Pro呢款高階版本，為免混淆用家，Meizu就決定開發全新嘅PRO旗艦系列，而首作就係PRO5。跟唔少大牌子嘅旗艦機一樣，PRO5改用全金屬機身，圓角直板設計未算驚喜，但係表面、邊位順滑，手感、質感都極好。另外，PRO5會有金、銀白、銀黑三款色水之外，仲追加今期最紅嘅玫瑰金，擺明向iPhone致敬。

S6同級硬件

至於硬件當然都係超班，採用Exynos 7420八核心處理器，同Galaxy S6、Note 5用埋同一隻處理器晶片，配合3GB或4GB RAM，效能極強，難怪跑分竟然逾73,000分，相當驚人。作為旗艦機，鏡頭質素都唔可以輸蝕，佢改用Sony出品嘅2,116萬像素CMOS，並可拍攝4K影片；最特別係內置PDAF及激光兩大對焦系統，令對焦速度快得多，拍攝動態畫面就最啱用。唯一要扣分就係作為旗艦機，PRO5只係搭載5.7吋全高清芒，顯示效果仍然唔錯，假如升級埋2K解像度就肯定更好睇！定價方面，PRO5分為標準版同埋高配版，前者內置3GB RAM及32GB ROM，售價為2,799元人民幣；後者改用4GB RAM及64GB ROM，並附送原廠EP-31耳機，售3,099元人民幣。新機將會於10月12日在內地正式有售，行貨暫時未有消息，香港用家要等一等。