距離今季NBA開鑼只有一個月左右，不過至今都未有重量級嘅轉會發生，較為具話題性嘅，就只有林書豪由Lakers轉投Hornets，以及LaMarcus Aldridge離開Blazers變成Spurs一員，相對而言，波鞋界嘅新聞就精彩得多，KD 8早於暑假期間已經開售，至於一直傳聞多多，Spy圖片喺網上日日有新款嘅LeBron XIII，真身終於出場，並且啱啱抵港上架，一班「大帝」子民仲唔快快接駕！

LeBron XIII EP $1,599

Nike喺昨日正式發表LeBron XIII，當然唔少得主人翁LeBron James現身，紫色版本名為「Written in the Stars」，將於10月1日喺Nike Basketball Store及Nikestore.com.hk開售。

唔只鞋領兩側，就連腳背中段都有Hyperposite，從多方位加強支撐力。

鞋底中段換上大型支撐片，為腳弓帶嚟更大嘅承托作用。

LeBron XIII $1,599

鞋尾位置明顯比兩側中筒低得多，方便用家做出蹬直腳背嘅動作。

其實喺第192期嘅《SLAM》，LeBron James已經着住LeBron XIII影封面。

$1,699

$849

加強腳弓承托

首輪抵港嘅備有紅、紫雙色選擇，整體設計與LeBron XII一脈相承，例如LeBron XII最出位嘅分區式Zoom Air，LeBron XIII亦都沿用。除此之外，今代LeBron刻意加強對腳掌中段嘅承托力，鞋底中間換上大片嘅黑色支撐片，而且大幅度向兩側鞋身延伸，對於扁平足嘅用家而言，相信會更加感覺良好。

Hyperposite重新擺位

另一方面，上一代深入民心嘅Hyperposite支撐組件，亦都喺LeBron XIII身上重現，不過位置上有明顯改動，LeBron XII係由外側中間延伸至鞋領，繼而向後包住鞋踭，最後伸向內側鞋領；LeBron XIII就改為分區式布局，最大一塊Hyperposite設計成三葉形狀，覆蓋外側鞋領，內側另有一塊五角形嘅Hyperposite，最特別係鞋身中段都有一塊長條形嘅Hyperposite，由內側延伸至腳背，整個新布局喺保持靈活性及保護性之餘，亦都增強咗耐用性與支撐性，配合不對稱嘅鞋帶系統，從而提升鎖定能力，足以對應「大帝」高速時嘅強大扭矩。此外，LeBron XIII嘅鞋尾位置特別低，令用家更易做出蹬直腳背嘅動作，加速、起跳更加輕鬆自然之餘，足踝兩側依然有高身嘅中筒保護。鞋身方面，透氣網眼配合Flywire，帶嚟猶如波襪般嘅貼腳度與靈活性，而且透氣度高，令「大帝」可以喺自然、隨意嘅加速之中，都有充足嘅鎖定效果。

Kobe X Elite Low

養傷多時嘅Kobe Bryant，最近頻頻上載自己已經落場練波嘅相片，睇嚟趕及新球季復出並不是夢，身為Kobe粉絲當然開心，Nike今期亦都錦上添花，推出Kobe X Elite Low，以原來嘅低筒版本為基礎，不過鞋面由合成物料改為更輕、更薄、更貼腳、更透氣嘅Flyknit，增加舒適度之餘，仲喺鞋頭、鞋身內側及外側分別織出粉紅、灰和黑三種顏色，比起單色版本更加Chok！

Kyrie 1 EP

雖然Kyrie Irving仲要休息多一段時間，唔似Kobe有望趕及開咧，不過Nike未有大細超，同步亦都推出全新配色嘅Kyrie 1 EP，以充滿神秘感嘅黑色為主，而鞋領兩側、鞋舌上嘅KD標誌，以及鞋舌背後嘅簽名字樣用上Tiffany嘅湖水綠，與主色形成強烈對比，加埋鞋尾嘅窩釘形布局，仲有中底嘅鋸齒紋理以及Hyperfuse鞋面嘅無縫網眼，令整個外觀更見前衞色彩。

查詢︰2520 0771（灣仔莊士敦道Nike Basketball Store）

文︰Dick

攝︰Paul