早前網上瘋傳一個叫「盲人觀星營」的活動,網民嘲笑:「盲人點觀星呀?」我有一個天文發燒友朋友,她看了此Post後,便寫了千字文回應:「作為香港大學學生會天文學會莊員,我想講,好多時睇唔到星,我哋都可以講星,不論係恒星、行星、星座、星雲、星團、星系、甚至係星座神話,只要同星星有關,都可以講一晚。因為,星空都是大家所喜歡的。盲人觀星團,點解唔得呀?」我除了看到她的一團火外,也看得我成頭都係星,恒星行星星座星雲星團星系很多星星,但我跟它們全都不熟,我只看過一集《來自星星的你》咋!

盲人觀星營也令我成頭都係問號,看不見的朋友,如何去「聽」星?跟這「盲人觀星傷健營」的負責人談過,才知道這不可能的任務原來是可能的!主辦單位已是第六年舉辦盲人觀星活動,由最初的幾十人到現時的參加人數達到二千人,他們累積的經驗也愈來愈多,再加上科技的協助,營中可以提供「點字星圖」,讓視障人士可以「摸得到星」,知道星的位置,另外也會用3D打印製作立體月球的模型,讓視障人士「觸得到月亮」,知道月球表面的質地、大概的形狀,到觀星時再聽專業人士詳盡的講解,把幾方面集結。了解過後,我斗膽說句,視障人士去觀星,觀到的層面肯定比我們開眼人的多!盲人觀星團,點解唔得呀?