摺機 Galaxy Folder 智能翻生

潮流係一個大循環，十幾廿年前的舊物都可以忽然潮起來，就連手機都唔例外，曾大熱一時的摺機，原來時至今日都有新款推出，佢就係Samsung Galaxy Folder。此手機懷舊得來都與時並進，支援篤芒兼行Android，睇YouTube、玩Facebook都得！

機面壓滿紋理，設計有心思。$2,380

Keypad按鍵面積相當大，不易撳錯。

可以拆殼兼換電，亦支援記憶卡擴充容量。

機背800萬像素鏡頭不設閃光燈，拍攝功能亦簡單。

配備SNS鍵，可以設定為常用社交程式，亦可自訂為其他程式快捷鍵。

《S Health》可以記錄用家行走步數等數據。

採用四核心處理器，跑分約二萬，效能一般。

LG Gentle仿皮設計夠晒高貴，提供多個快捷鍵，操作就手。 $1,680

菱格細紋有心思

其實家陣仲有唔少日系廠商推出新款摺機，不過多屬Feature Phone，今時今日點夠用？韓廠Samsung就做齣好戲，Galaxy Folder忠實呈現傳統摺機造型之同時，亦不忘在Detail位上花心思，機面壓上大量菱格細紋，加上粗身橫間花紋，簡約又精緻。打開機身，上半部係3.8吋屏幕，解像度有800×480，可視角、亮度都唔錯，最重要係支援篤芒操作，多點撥頁、多點觸控統統冇問題。下半部分就係鍵盤，1至9數目字、接聽、結束通話等按鍵當然有齊，特別在提供聯絡人、短訊、相機及容許用家自訂的SNS共四個快捷鍵，令操作更方便。

預載Android 5.1

至於作業系統，Galaxy Folder預載Android 5.1，配合篤芒，所有操作與一般智能手機相當接近；唯一不習慣就係Galaxy Folder將Android機的Recent Apps、返回、主頁三個功能鍵放置於機身下半部分，篤芒使用時要上下來回。亦因屬入門機，故預載Apps數量不多，較實用就有記錄步行等健康資訊的《S Health》、令系統保持暢順的《效能優化精靈》等。順帶一提，此機原生支援繁體中文介面，可惜只內置拼音輸入法，如果有埋港人常用的筆畫輸入就更好。另外，佢兼容4G制式，想極速上網串流同下載Apps都冇問題。