日本限定支線 發展新形勢
當你知道J Brand、theory同HELMUT LANG呢三個歐美時裝品牌，現時都屬於UNIQLO總公司Fast Retailing旗下，你就知道日本人做生意真係唔講得笑！其實除咗呢類一買一賣嘅「國籍轉移」，另一種於日本設立支線以協助品牌擴展亞洲版圖嘅情況亦好普遍，其中由英國時裝品牌Burberry授權日本三陽商會所生產的日本支線系列Blue Label及Black Label最為人所熟悉，但早前雙方結束多年合作關係，令呢個曾經紅極一時嘅「混血兒」時裝品牌正式講Bye Bye！（口係）呢個曲終人散嘅時候，不如趁機回顧一下家陣「Yen低」去日本仲有咩獨家限定支線可以掃！
美國牛仔褲品牌J Brand現已收歸Fast Retailing旗下。
美國時裝品牌theory亦係由日本人做老闆。
乾濕褸設計仍然出現於Black Label Crestbridge & Blue Label Crestbridge 2015 F/W。
Black Label Crestbridge & Blue Label Crestbridge設計總監三原康裕。
LANVIN en Bleu設計同定價較法國LANVIN親民。
BLACKBARRETT by NEIL BARRETT早期以暗黑風格作主調。
The North Face Purple Label雖然貴啲，但設計較主線更適合日常着用。
曇花一現的THOM BROWNE支線THOM GREY。
擁有超過160年歷史的殿堂級美國戶外靴牌White’s Boots上年亦被ABC MART收歸旗下，相信Wesco、Viberg及Red Wing等等美國經典靴牌不日都會落入日本人手中。
Burberry Blue Label & Black Label
曾經只限於日本國內發售的Burberry Blue Label & Black Label，於2010年時曾衝出日本，選址銅鑼灣及沙田開設專門店（可能要方便中國同胞南下掃貨）。隨着雙方關係於今年6月30日結束，沙田專門店亦已結業，而銅鑼灣名店坊專門店就跟隨品牌名字由Burberry Black & Blue變成Black Label Crestbridge & Blue Label Crestbridge，三陽商會方面更邀請三原康裕擔任品牌創作總監，服飾方面， 2015 F/W 秋冬仍見到大量乾濕褸設計，始終雙方合作多時，要順利過渡係要番少少時間。
LANVIN en Bleu
除Burberry外LANVIN係另一個（口係）日本開設支線系列的時裝品牌，而LANVIN en Bleu更只限於日本發售，設計當然唔係法國LANVIN主帥Alber Elbaz負責，服飾風格比較偏向年輕少女，售價亦較為親民，去日本買嚟做手信最（口岩）！
BLACKBARRETT by NEIL BARRETT
2008年登場的BLACKBARRETT by NEIL BARRETT是設計師Neil Barrett特別為日本市場而打造的支線系列，風格以暗黑格調為主，發展多季至今已經擺脫「一味黑」嘅沉悶風格，但依然係由Neil Barrett所主理。
The North Face Purple Label
對於追開山系造型嘅潮人嚟講，見到The North Face Purple Label已經兩眼發光，皆因設計係由日本機能性品牌nanamica同The North Face共同主理，剪裁用料配色完全擺脫主線風格，而且定價貴過主線多多聲，真係「妹仔大過主人婆」！
THOM GREY
曾經於2012年到2013年期間曇花一現的THOM BROWNE支線THOM GREY（現已結束），雖然無講到明係同日本方面合作，但全個系列所有單品均Made in Japan，而且剪裁亦更貼近亞洲人身形，再加上2013年THOM BROWNE於日本南青山開設亞洲首間旗艦店，相信品牌都早已鎖定日本市場為重要據點，而且品牌名字都係一貫日本限定支線以顏色以資識別，綜合多個疑點，此支線出現同日本都有莫大關係（我估咋）。
Danner & White's Boots
美國經典戶外靴品牌Danner母公司LaCrosse Footwear於2012年時已經被日本ABC MART收購，對於向來崇洋嘅日本人嚟講，可以買入一個擁有幾十年歷史嘅美國品牌，1.38億美元呢個價錢應該都好抵！2014年LaCrosse Footwear又成功收購另一擁有超過160年歷史的殿堂級美國戶外靴牌White's Boots，相信未來兩牌會有更多與日牌聯名之靴款出現。
文：Pasu
