獅羊打頭陣　華麗黃金魂

為紀念《聖鬥士星矢》30周年而創作嘅外傳故事《黃金魂》，講述原本齊齊喺《冥王篇》嘆息之牆之前犧牲嘅12個黃金聖鬥士，失驚無神竟然全數喺北歐嘅阿斯格特復活，仲要重蹈青銅五小強嘅舊路，同北歐神鬥士再打一餐……如此劇情，接受與否見仁見智，最令人意外嘅係竟然有「崩壞」畫面出現，今時今日嘅畫工，仲衰過10幾年前嘅《冥王篇》？好彩「聖衣神話EX」未有跟到足，只係將最型、最Chok一面實體化出嚟，聖鬥士嘅粉絲可以放心入貨。

聖衣神話EX—黃金魂
獅子座艾奧里亞
建議零售價︰¥10,000

聖衣神話EX—黃金魂
白羊座阿穆
建議零售價︰¥10,000

除咗多對翼，「黃金魂」嘅羊角仲多咗雕花，更見華麗。

肩甲設有多重關節，可以大幅度後移，以免阻礙雙臂擺動。

加上黃金翼嘅獅子座，多咗一份日本浮世繪嘅風格。

白羊座都可以多對翼，相信創作星座神話嘅古希臘星相學家都始料不及吧！

聖衣神話EX「三大“神”特典」Boxset（非賣品，只限「黃金魂」獅子座初回特典。）

聖衣神話EX「God Stage Set神台座」
建議零售價：¥2,500（每盒包括三套底座）

人人多對翼

美其名係30周年紀念，其實重開商品線先係《黃金魂》嘅真任務，睇番官方人設，重新設計嘅黃金12宮，與以往嘅最大分別係背脊統統多咗對大得誇張嘅黃金翼，與神聖衣嘅青銅五小強睇齊。「聖衣神話EX—黃金魂」首輪推出嘅獅子座艾奧里亞與白羊座阿穆，亦都忠實還原呢個新特色，而且聖衣主體有更多層疊位，盔甲表面亦多咗弧線浮雕，整體造型確比以往嘅黃金12宮版本華麗得多；尤其是素體設計看似與前作相同，其實腳底悄悄加厚咗（官網與說明書都冇提到），與神聖衣青銅五小強拍埋一齊嘅話，高咗成個頭，忠實重現番黃金聖衣與星矢等人嘅年齡分野。

含金量高夠足秤

唔只神高神大，「聖衣神話EX—黃金魂」亦都好夠斤両，就以獅子座為例，除咗頭盔、腹甲與黃金翼係膠件，其餘嘅聖衣組件都係合金製成，筆者以電子磅度過，重約302g，至於白羊座就有365g，皆因後者對黃金翼比獅子座更長更厚，亦正因如此，白羊座的重心難免明顯後傾，想唔用底座就擺到甫士嘅話，實在幾大難度。另一方面，如果粉絲有買到之前嘅同系黃金12宮嘅話，大可將「黃金魂」嘅黃金翼拆下，換上舊版嘅斗篷組件，增加玩味。窩心提示︰「黃金魂」獅子座嘅手肘、膝頭同足踝，都有模仿獅子鬃毛設計而成嘅彎角，角位尖到拮損手，筆者都中招，巴打們小心！

初回特典有買趁手

正傳故事以星矢為第一男主角，至於《黃金魂》就改由獅子座艾奧里亞擔綱，身為男主角，自然有優待，「黃金魂」獅子座就加送「三大"神"特典」Boxset Parts，內有專用地台撐起光速特效組件，用嚟模仿獅子座嘅必殺技「閃電光速拳」，隨盒再跟一個File夾，用來收藏「黃金魂」附送嘅「聖衣分解裝着圖」。雖然「聖衣神話」系列會失驚無神出復刻，但係Bandai已經喺官網講明，「三大"神"特典」只屬初回特典，就算「黃金魂」獅子座出復刻都唔會包，獅子座嘅粉絲入貨要快！