紅米Note 2 平民機王

紅米Note嘅後繼機「紅米Note 2」，水貨已火速抵港。新機不但有5.5吋靚芒，而且內置1,300萬像素主鏡頭及八核心處理器，但機價依然「大件夾抵食」，一千蚊鬆啲埋單，可說是新一代平民機王。

$1,280

使用3,060mAh電池，亦支援雙卡雙待。

機背改用磨沙物料，手感、外觀齊齊提升。

《Antutu》程式顯示新機得分為44,029分，得分超越HTC One M8及Galaxy S5等上代旗艦機。

內置「極簡模式」，介面圖示可以變大，長者特別啱用。

從屏幕底部由下至上一掃就會彈出快捷功能表，可以控制Wi-Fi、藍芽、靜音模式等功能的開關。

偷薄減重

上一代紅米Note雖然又平又抵用，可惜機身巨型又累贅。紅米Note 2就特意喺輕量化下工夫，雖然跟上一代同樣搭載5.5吋屏幕，不過機身體積及重量都大幅「減磅」，例如厚度由9.45mm減至8.25mm，重量更加激減逾一成，由185g減到160g，令機身輕巧便攜得多。此外，機背殼亦由以往的拋光換成磨沙表面，觸感舒適，值得一讚的是設計更美觀。規格方面，除了屏幕解像度提升至1,080p，處理器亦改用MediaTek X10 2GHz八核心，配合2GB RAM，撥頁、開Apps均見暢順，內存由上一代8GB增加至16GB，再裝多啲Apps都唔驚空間不足！

中港4G

最值得拍爛手掌嘅係新機不但支援外置記憶卡作擴充容量，而且沿用可更換式電池設計，手機冇電唔使狼狽搵地方充電，換舊後備電就搞掂。至於鏡頭，維持上一代500萬像素前置及1,300萬像素後置。內置功能都有所升級，前鏡頭設有三級美顏，後鏡頭內置場景、HDR及手動模式，再加埋12款即時濾鏡。順帶一提，此機有兩個版本，分別是定價人民幣$799（約$974）、只支援內地網絡制式嘅「移動版」；以及兼容中港3G和4G網絡、定價人民幣$899（約$1,096）嘅「雙網通版」，而「雙網通版」嘅官方及水貨價差額不足二百蚊，未有出現炒價，有興趣嘅朋友不妨趁早入手。