想以油尖旺的價錢，品嘗中環級數的靚扒，在中環開業的Metal Steak便做得到！餐廳是全港首間的日式「半立食」扒房，走輕鬆平民路線，採用即磅即烤的方式，客人想食幾多點幾多。約$400就品嘗到佐賀A4和牛，牛扒油花甘香，是近期必試推介！

烤爐以日本火山石製造，十分惹火，客人更可直擊整個烤肉過程！餐廳大門、店內均以貨櫃作布置主題，寓意牛扒空運到港即送到店裏，原件牛肉即切即烤，不加任何醃料，夠晒新鮮！

佐賀A4和牛西冷 $722/380克
和牛西冷油花分布均勻，亦由於油花太多會有點膩，一般人未必食得晒，故大廚建議點200克左右，分量剛好。

新西蘭牛柳 $210/300克
有別美國牛和日本和牛的油膩，新西蘭牛柳的脂肪較少，牛味與別不同，建議配忌廉芥末籽醬，以突出牛肉的鮮甜味。

佐賀A4和牛肉眼 $540/300克
和牛肉眼與味道較淡的薄荷啫喱是絕配，5成熟是最佳之選；牛扒上的炸蒜片，更是大廚親自秘製，能帶出牛扒的鮮香味道。

餐廳分上、下兩層，皆掛有多幅牛隻解剖圖，用上高枱和高櫈，帶出工業風格調，而2樓更放有一張8人大枱。

老闆Kenny去年在新宿品嘗過人氣立食和牛滋味，一試難忘！大大件的牛扒，即點即煮，原汁原味，每件價錢都以重量計算，客人想食幾多點幾多。經營多間人氣韓式餐廳的Kenny，眼見香港沒有同類餐廳，故特別引入此模式，開設全港首間半立食日式扒房。那麼何謂「半立食」呢？原來Kenny想經營一間立食餐廳，但怕香港人不適應，遂先以高枱高櫈試行，客人可安坐在高櫈上或站在高枱前以「立食」形式品嘗，若反應良好，遲些便會改為全立食。

$400有找歎佐賀和牛

餐廳採用半開放式廚房，客人可隔着玻璃，從廚櫃挑選心水牛扒。揀好牛扒後，便到收銀處買票，以200克起計算。例如選擇佐賀和牛肉眼扒，價錢為每克$1.8，即約$400就能品嘗到約220克的肉眼扒，十分抵食，而客人更可站在半開放式的廚房外，觀賞整個燒扒的過程。餐廳現時供應6款靚肉，分別是佐賀A4和牛西冷、佐賀A4和牛肉眼、美國安格斯西冷、美國安格斯肉眼、新西蘭牛柳及西班牙黑毛豬，所有靚肉均未經醃製，燒烤時只略撒海鹽調味。品嘗時，可搭配大廚秘製的5款醬汁，當中以雜果黑醋和柚子汁最為特別，清新得來富陣陣果味，且能平衡牛扒的油膩感。

和牛西冷才是王道

火光熊熊的烤爐由日本火山石製造，火力平均，以800℃至1,000℃的高溫燒扒。點選4成熟的牛扒，以鐵板盛載上枱，切開依然保持粉嫩的Medium Rare，可見師傅的燒烤技術準繩。大廚Pat謂，要品嘗和牛真味，必吃和牛西冷，因西冷油脂甘香、纖維少，能吃到靚絕油花入口即化的口感，比和牛肉眼更出色。他又提到美國安格斯與日本佐賀和牛的口感，各有優勝之處，但口感相差很遠，建議二人來開餐的話，不妨點選同一個國家出品的牛扒，不然會將另一款比下去，滋味大減。

Shop Info

Metal Steak

地址：中環歌賦街41號地下

電話：2338 2828

文：Kiwi　

攝：Pen