後生向　Toyota Sienta

對於本地小型MPV用家嚟講，一定唔會對豐田（Toyota）Sienta感到陌生，想當年只有水貨到港，依然賣到成行成市；如今新一代接棒登場，代理當然唔可以再走寶啦！實用性變得更高之餘，新Sienta仲變得靚仔咗、Young Look咗好多，唔似上一代咁家庭車Feel，擺明不再是昔日家庭向，今代Sienta已變成後生向了。

後排可以輕易收入地台之內，而且改用50：50分割比例，Leg-room就比上一代多咗70mm。

雖然新Sienta仍然係小型MPV類別，不過車廂空間絕對唔細，有圖為證，坐咗咁多個大隻佬都冇投訴。

除o左今次試車嘅「跳躍黃」，新Sienta仲有七種車身顏色選擇。

車廂高達1,145mm，既有充足嘅Head-room，膝頭與前排椅背距離又多咗25mm，唔似上一代咁易頂腳。

1.5L VVT-iE引擎嘅力量表現未算驚喜，不過低耗油表現已經贏到唔少Like。

車廂多處都有儲物格及杯架，設計夠晒周全、細心。

中控台布局層次分明、簡潔利落，P牌人士都好易上手。

地台離地距只有330mm，出入車廂分外容易。

上一代Sienta走Cute路線，全車線條圓碌碌，今代就好唔同，主線條統統變得硬朗，而且不失流線性。車頭改動最大，大圓燈唔見咗，改為欖角造型，而且大幅度向車側伸延，鬼面罩就變成倒U形，仲有框邊與霧燈及頭燈串連起嚟，分外破格，令車頭各項細節變得一體化，互有連繫，反觀傳統設計則沒那麼講究。除此之外，新Sienta備有八款車身顏色選擇，當中包括「青草綠」、「閃電藍」、「火辣紅」以及今次試車嘅「跳躍黃」，據代理表示，自開售以來就以後者最銷得。

低地台雙趟門出入Easy

新Sienta嘅車身高達1,675mm，可以預期車廂空間唔會失禮，加埋雙電動趟門設計，手柄設有輕觸式功能，簡單一按就會自動打開，進出口闊度為665mm，加上地台離地距只有330mm，比上一代降低咗55mm，小孩、長者出出入入都分外方便。置身車廂內，車廂高度就有1,145mm，空間感果然冇令人失望，前方視野夠晒廣闊，而後排座椅就有明顯改動，上一代布置成獨立式座椅，今代變成50：50分割比例，加埋一拉式收納功能，輕輕鬆鬆就可將部分或整個後排收喺地台之下，藉此騰出最高1,040mm、最闊1,260mm嘅置物空間，足夠放單車。中控台用上多層次設計，上層屏幕、中間音響、底層係波棍台，表面仲有顏色縫線點綴，豐富視覺效果，事關年輕車迷特別着緊外在美。其餘布局亦有所改動，包括改用三幅式多功能軚環及雙圈式儀錶板，儀錶板中間設有4.2吋屏幕，顯示耗油量等行車資訊。為咗增加實用性，車廂多個角落都設有儲物格，雜物再多都唔怕冇位放。

耗油少車價低性價比高

Sienta嘅實用性，唔只體現喺車廂布局，仲有性能表現。引擎容積不變，與上一代同為1.5L，不過今代加入VVT-iE，馬力與扭力分別達109ps及13.9kgm，配合新一代無段變速自動波，起步、加速都流暢順滑，比起上一代Smooth得多，至於廠方公布嘅耗油量，以JC08模式計算，只有20.2km/L，按目前油價計算，油費只係$0.8/km，加上車價只係$234,920起。老老實實，當1.5L四門房車都已經賣到接近$200,000，而耗油量幾乎一樣，甚至更低，仲可以載多兩個人嘅Sienta與之相比較，邊款抵買？唔係仲要問啩！