早前約了Rosa到她的寫字樓，錄我的網台節目《格羅茲尼》，之後連同舊節目《榕樹頭》幾位幕後去食晚飯。在灣仔找食的，話易不易、話難不難。其中有人提議到一間剛剛乘車時看到的暗角餐廳，應該是食西班牙菜，因為餐廳名為「Catalunya」。去到現場，起碼自己已經喜歡，因為又黑又暗，裝修又靚，仲有客人在內任意大聲傾談，好驚那些懶有格調個個細細聲講嘢的西餐廳！

坐定定後，除了只懂得叫墨魚汁炒飯、炸魷魚圈之外，真係唔識叫。於是向那位無論樣貌同講嘢都似李綺虹的女侍應說：「其實我哋唔係好識叫，有冇啲又脆又肥膩又唔健康嘅嘢？」她笑說：「大把！」之後分了兩次點了十幾款菜！名字就不要問我，有些好好食，有些麻麻！先講麻麻的菜，其中有番茄Tartar及蛋殼內有三層不知是甚麼的東西及煙熏小蝦，不太欣賞。此外還試了一些有趣東西，如牛油果龍蝦圈、炸鹹火腿及一件炸圓餅，樣貌及味道都好得意！

不過有三味菜真係好味到震！一個係切成一塊塊四方形的豬肉，上面有一塊脆皮，香口到暈！另一個係用了不知甚麼果仁醃製之燒雞，連皮食好正！最後一味係燒乳豬，侍應用瓷碟把乳豬切開幾件才上枱，我趁熱一手撕開豬髀，無論口感或味道氣味都一流！而那隻碟還可跟侍應去玩掉爛佢！

還有那西班牙啤酒，滑口不苦，想起也想再飲！不過，這餐廳比同類型的貴一倍，五個人食咗四千五，其實算誇張，屈老細請客的話，這是好選擇！