最近有位曼聯忠粉，將身份證嘅英文姓名改做「LAW, Manchester United Dick」，老老實實，筆者都係紅魔鬼嘅球迷，咁啱又叫阿Dick，不過真係做唔到羅生咁盡，又好少畀人Check身份證，忠心呢樣嘢，都係着上身實際得多。身為紅魔同路人，相信大家已經買咗主場波衫，作客又入咗手未？一黑一白兩款戰衣已經接棒上架，你又Buy邊款多啲？

adidas曼聯2015/16 Climacool作客球衣 $629（另有adizero版本售$1,099）

adidas曼聯2015/16 Climacool第三作客球衣 $629（另有adizero版本售$1,099）

除咗喺英超第二輪作客維拉外，多位曼聯主將早前出席英國嘅adidas #BETHEDIFFERENCE活動時，亦都着上白色作客波衫醒目示人。

包括隊徽在內，衫身多個細節都用上橙紅色，同主色形成強烈對比。

衫身布滿嘅M字形暗花，設計靈感嚟自1990至92年嘅作客波衫。

adidas祖雲達斯2015/16 Climacool第三作客球衣 $629

祖記31次喺意甲封王，呢個金色隊徽襯到絕！

adidas AC米蘭2015/16 Climacool第三作客球衣 $629

領位背後嘅特製國旗，出於紀念世博會2015所設。

懷舊白衣　向Busby年代致敬

紅色主場波衫玩復古Feel，白色作客都唔例外，驟眼睇，基本Pattern同主場款式好相似，同樣用咗V領剪裁，領口又有紅黑白三色線條，就連衫袖嘅三間條紋，以及衫腳嘅M字壓花都跟到足，唯一例外就係成個衫袖都用上白色，唔似主場款式以紅色為主，袖口就加上白色Layer。其實呢款作客波衫唔只將主場嘅顏色主次配搭對調，仲係向球會歷史致敬，事關上世紀60年代，即係由Busby爵士領軍嗰陣，曼聯嘅作客波衫已經常常用白色為主、紅色為輔嘅設計；反觀自90年代至今，曼聯波衫已經好少用「白紅配」。如今重拾古風，懷舊之中又令人眼前一亮，仲唔係Modern Classic嘅好例子？

黑戰袍　大膽撞色

主場、作客都玩復古，第三作客波衫會唔會都同一個Tone？好彩……唔係！作客波衫嘅設計，向來比主場少啲限制，今季嘅曼聯第三作客款式一於玩盡啲，黑色設計係唔係好有氣勢呢？其實對上一件曼聯黑色作客波衫，已經係2010/11嘅事，嗰季我哋贏到第19個英超冠軍，今季又會唔會有盃捧呢？除此之外，新波衫嘅膊頭三間，仲有心口嘅三間商標與隊徽，以及袖口橫間都用咗螢光橙紅色，與主色大玩撞色效果，分外Sharp醒！更加有心思嘅地方，就係衫身正面印咗一連串嘅M字形暗花，即係主場與白色作客衫腳上嘅同款壓花，點解三件波衫都對呢個Pattern情有獨鍾？原來1990至92年嘅作客波衫，就印滿咗呢款圖案，M字代表乜？唔係仲要問啩！至於買白色還是黑色好？忠心，梗係要多多益善，我就預咗呢個月餐餐食麵包都要買齊佢哋着上身，你跟唔跟先？

意甲擴充版圖

今年由剔牌轉投三間嘅，唔只曼聯，仲有意甲班霸祖雲達斯，雖然後者嘅波衫設計框架多多，例如主場一定要係黑白直間，考起唔少設計師，不過adidas依然有妙筆，喺直間邊緣加上鋸斷紋，當堂唔同晒；作客方面，最新推出嘅第三作客波衫就有更大嘅發揮空間，大膽用上「黑金配」，喺神秘感之中流露班霸獨有嘅尊貴氣息。原來本年度嘅adidas歐洲六大球會第三作客波衫，都用上「Spark in the Night」為設計主題，以深色寓意黑夜，而衫身細節就用上鮮艷顏色，象徵各大球隊在濃濃夜色之下力拚，擦出耀目火花，同屬意甲勁旅嘅AC米蘭都唔例外，以深綠色為主，襯上檸檬黃，最有意思係領位背後繡上意大利嘅三色國旗，國旗四周又有好多唔同顏色嘅小方塊，代表與世界各國聯結一起，皆因本年度嘅世界博覽會就喺意大利舉行。

查詢︰2317 1686（旺角朗豪坊7樓L701 Futbol Trend）、2527 0217（旺角通菜街63-65號地下adidas Football Store）

文︰Dick

攝︰Paul（產品）