在深水埗亂逛，左翻右翻後買了幾隻二手港產片VCD，其中一隻是1999年的《網上怪談》。農曆七月看港產鬼片，應該好有Feel。

坦白講，以前未聽過這套片，好懷疑有無正式上過戲院。起初以為係Cult片，放來看才知是套徹底的爛片，係爛到不堪，連當笑片看的資格也沒有！電影只是加入當時興起的互聯網、Email、Website作元素，其餘東西真的一塌糊塗，無論前文後理、劇情、拍攝手法、化妝……都是小學級，除了黎耀祥及那個小妹妹起碼認真少少做戲外，其他人都Hea到爆！莫非他們全部都係義工？或被迫來拍電影？片名雖然名為《網上怪談》，但內容其實分三個單元故事，除第一個關網絡事外，其餘兩個故事完全同網絡無關！當年他們是如何呃到老闆畀錢拍呢？但拍完睇完老闆收貨嗰下好嘢！

講幾段可怕內容。第一個單元，一班後生仔因上鬼網被困屋內，一個個失蹤一個個死，四處逃走之際，其實電話又無斷，網絡又無斷，但又唔求救又唔報警！好笑！第二個單元，已死的姐姐出現屋內，為保護妹妹把三名來犯者斬死，成屋係血、天台係血，事主鎮定到！交啲戲好冇！第三個單元後尾無端端斬死一個忽然出現的老師，無連貫性之餘，仲煞有介事話要知道甚麼是真正之千年蟲！無譜到呢！當年興講千年蟲，硬入一個位，個編劇好恐怖！而全戲最爛一幕是，一個青年病發，朋友們衝去餵藥灌水，再齊齊縮手，青年好番，但粒藥其實仲喺塊面上！仲要大Close Up添！想點呀？