唔經唔覺，平成年代嘅第16套拉打作品《幪面超人Drive》都去到尾聲階段，電視版將於下個月27日播埋最後一集，不過商品化嘅進度似乎慢咗啲，繼四月尾出咗第一主角Kamen Rider Drive嘅基本形態Type Speed後，隨後只有Type Technique與Type Wild、第二男主角Mach和第三男主角入魔後嘅「魔進Chase」，加埋奸角Boss「心臟惡路程式」，就算連埋Mach與Chase嘅專用電單車，都仲有大把Item未出喎，稍安毋躁，Drive與Mach兩者Crossover嘅強化形態—Type Deadheat，今期已經接棒上架啦！

SHF Kamen Rider Drive Type Deadheat
建議零售價：¥4,800

頭部前後結合咗Drive與Mach嘅面相特色，最能展現「合體」神髓。

隨盒附有兩款大輪胎組件，包括圖中嘅基本型，胎面清晰印上「Dead Heat」字樣。

可動性維持SHF嘅高水準，只係大輪胎難免影響咗頸位嘅活動幅度。

勝在下盤夠重，單腳企甫士都難唔倒SHF Deadheat。

雙面頭雕最傳神

今時今日嘅拉打劇集，主角唔再得一個，就算係第一男主角都可以變做多種形態，用嚟力谷Figure市場，長出長有，Kamen Rider Drive都唔例外，既可透過本身嘅變身道具Shift Car，變成Drive、Technique、Wild及Formula等形態外，仲可以好似Kamen Rider W玩合體，融入Mach嘅性能，變成Deadheat進化形態。SHF版本都算高度還原呢款人設特色，例如四肢就係Mach嘅白色造型，右邊膊頭亦有Mach專用嘅小輪胎，至於紅色上半身與大輪胎，仲有左肩甲、變身腰帶與左前臂嘅Shift Car裝置，一望就知係Drive嘅專屬細節。最過癮係頭部設計，正面係Dirve嘅面相，Mach嘅面罩就變成後尾枕，絕對係Drive與Mach合體後最傳神嘅位置所在。

甫士有力下盤夠穩

由膊頭上嘅小輪胎、上半身嘅大輪胎、腰帶變身器與左前臂嘅Shift Car裝置，SHF Kamen Rider Type Deadheat都有換件設計，不過除咗跟盒嘅兩款大輪胎組件，其他換件Parts都藏身於同系嘅其他角色Boxset之內，換言之想儲齊呢啲小道具，幾乎要買齊成個系列，Bandai認真識計數。至於主體設計方面，今時今日嘅SHF拉打，唔使旨意有合金成分，還幸Deadheat係以Mach為設計基礎，而SHF Mach勝在下盤夠重、接地性高，就連金雞獨立嘅飛腳甫士都擺得到，擺其他甫士又點會企唔穩？不過SHF Drive與Mach嘅小問題，Deadheat亦都有齊，例如Drive上半身孭住條大輪胎，影響咗頸位嘅活動幅度，Mach右邊膊頭嘅小輪胎就會妨礙肩甲活動，左手手肘嘅裝甲又容易甩，睇怕今年12月加推嘅Deadheat Mach都會有呢啲「遺傳病」，買唔買得過就見仁見智了。

查詢︰2433 1828（瑞華行）

文︰Dick　攝︰Homan