有天乘的士回家，差不多到達時，整程車也很沉默的司機叔叔突然開腔（不是討論「烏爸」跟的士的辯題，要討論的話我要開一個星期的論壇）。的士轉入我居住屋苑的那條街時，司機說：「呢區……都冇乜發展(o架)啦！」本來放工回家已很累的我，聽到這句即時醒醒，甚麼？呢區冇發展？呢區不知幾多發展！司機叔叔補問：「你住呢頭(o架)可？」恐防自己的迫擊炮沒對準目標。我說是，並回應：「呢度唔係冇發展喎，蘇豪東呢頭好多食肆，好多人嚟食飯飲嘢。」「咁都係夜晚食飯先有人啦，平時咪冇人囉！」「唔係喎，Lunch都好多人(o架)，附近鰂魚涌商業區啲人會過嚟食飯，一到中午啲錶位爆晒！」司機好打得，鍥而不捨，還四周找論據：「呢，嗰間舖都做唔住執啦！」那家西式濕貨超市確是關門大吉了，但已圍了板，說不定已有新租客；大叔有風使盡(巾里)：「仲有嗰邊夾角嗰間又執笠！」那是一家我經常買麵包的店，作為常客我清楚知道它不是執笠：「佢裝修咋！仲要裝緊修都撥一忽仔地方繼續賣麵包呀！」討論區到這裏打住了，我落車。沒有正式結論這一區到底有沒有發展，可是我要謝謝這一位司機大叔，不是他「拮一拮」我，我沒發現原來我這麼想捍衞自己居住的社區，住了四年多，每天上班下班營營役役，平常不會細想，原來這裏有很多可愛的地方。