4K電視盒子比試樂視LeTV Box Pro vs 小米盒子1GB增強版

放工返屋企睇電視，最緊要有得揀節目，無理由成日都要睇啲反智嘢或者重播又重播嘅「冷飯」，不如花少少錢買個電視盒子氹吓自己開心。市面上大把國產電視盒子，質素當然有參差，要揀就揀信得過嘅。達人G今次就試吓新抵港嘅樂視盒子LeTV Box Pro，同埋賣咗一段日子嘅小米盒子1GB增強版，兩款都可以對應4K輸出！

樂視LeTV Box Pro（左）、小米盒子1GB增強版（右）

相比之下，小米盒子（左）外形比樂視盒子（右）細部得多。

樂視盒子視像內容提供較多選擇，如有自家製作的G.E.M.音樂會及日本《噬神者God Eater》動漫。

小米盒子暫時主打內地市場，內容口味未必太啱，但可以裝HKTV迎合香港用家。

小米盒子（上）機背有USB、Micro USB、HDMI、microSD卡槽；而樂視盒子（下）則設LAN插口、USB、HDMI、SPDIF，另外機側有一組USB及SD卡槽。

樂視盒子遙控器功能鍵較多，但按鍵尚算靈敏。

小米盒子嘅遙控器外形近似Apple TV遙控器，操作相當簡易。

樂視盒子提供大量4K電影、4K音樂及4K電視劇選擇。

小米盒子則要靠外在應用程式去播放視頻，目前未有4K選擇。

第1回合：鬥娛樂內容

樂視提供大量視像內容，綜藝、音樂、劇集、動漫等內容都有，更有自家製作內容，如G.E.M.演唱會（喜唔喜歡佢係另一件事），又緊貼播放日本動漫節目，如《噬神者God Eater》，一家大細都啱睇，呢方面明顯較小米盒子優勝。由於樂視盒子係行貨，故此可以選擇繁體中文介面同埋港版UI，不過視像內容會採用月費形式營運，贈送首6個月，之後每月收$99。小米盒子係內地引入版本，部分內容嘅應用程式被鎖，大家要自行找方法解鎖，雖然冇月費概念，亦冇追加費用，但對一般用家而言，實在有啲麻煩。

樂視盒子 Win！

第2回合：鬥操控連接

樂視盒子跟個新版遙控器，手感唔錯，按鍵算幾靈敏；而小米盒子遙控器則似Apple TV設計，按鍵較少，手感都好，而且不易按錯。機身連接介面方面，樂視盒子提供兩組USB端子及一個SD卡插槽；而小米盒子則只有一組USB端子、一組Micro USB端子及一個microSD卡槽，現時好多產品都採用microSD取代SD，都並非壞事。我達人G覺得其實兩者連接介面相差無幾，而且多媒體支援方面都好接近，一插入USB手指就認到多媒體檔案並且播放。

Draw！

第3回合：鬥4K輸出

雖然兩部電視盒子都具備4K輸出（3,840×2,160），可以駁4K電視觀看；問題係既然有4K輸出，到底有冇4K視像內容支援？小米盒子主要提供全高清影片內容，可能要靠4K電視自行升頻；樂視盒子背後有個完整嘅生態系統，提供大量4K視像內容，當中包括4K電影、4K音樂同4K電視劇，雖然未必所有內容都啱睇，但叫做有「真4K」睇。不過，要做到4K串流所牽涉嘅網絡頻寬較大，一來要搞清楚家中網絡頻寬係咪10Mbps以上之外，亦最好用LAN線接駁先穩定，達人G最初用Wi-Fi，就時常出現接駁問題。小米盒子就只提供Wi-Fi無線接駁，但都算穩定。

樂視盒子 Win！