繼續好玩MINI Cooper S 5-Door

以往嘅MINI Cooper，有型但唔夠實用，爭啲咩？三門設計囉，今代MINI就加推五門版本，香港用家再冇藉口投訴啦！方便咗之餘，仲有冇三門版咁好玩？就等筆者試試佢。

MINI Cooper S 5-Door

變身五門版，底盤設定依然紮實，攻彎樂趣絲毫不減。

一旦啟動Overboost，2.0L直四TwinPower Turbo嘅扭力就可以去到30.6kgm。

後泊距離感應功能，透過屏幕圖像清晰顯示。

車尾置物量有278L，比起三門版多咗67L。

對應MINI Visual Boost多媒體顯示屏幕嘅行車資訊控制器，置於波棍台後方。

置於冷氣控制台下面嘅引擎啟動掣，紅色設計分外易認。

唔只腳位拉長咗，後排嘅Head-room亦比三門版多咗15mm。

直立式尾燈加埋中置雙出排氣喉，布局工整易認。

今次測試嘅係Cooper S 5-Door，車身細細，但係引擎規格絕非小兒科，2.0L直四雙渦輪增壓，馬力及扭力分別去到192hp及28.5kgm，而且跟足三門版設有Overboost，畀大油時Turbo就會即時介入，將扭力推高到30.6kgm，步伐變得更爽快，筆者試過喺滿載情況下，無論燈位起步或者應付城隧入口嘅長命斜時，都感受到明顯嘅貼背感。除此之外，MINI Cooper S 5-Door備有Green、MID（標準）及Sport三種駕駛模式，筆者試過一支公喺多彎嘅大埔道遊車河，全程選用Sport模式，油門及波箱反應敏銳直接，加埋精良嘅底盤及懸掛設定，高速入彎都保持高度循迹性，就算多咗兩道門，都唔覺部車重咗、累贅咗。

車廂布局大同小異

唔只駕駛感受同三門版相近，整體車廂布局都同三門版一致，不過電窗掣改咗喺門邊，變得更就手。筆者最鍾意係中控台嘅8.8" MINI Visual Boost多媒體顯示屏幕附設LED Ring變色光環，行車時光環會自動轉色，令車廂更有氣氛。另一討好之處，就係車頂設有兩幅式天窗加天幕，夜晚去到五光十色嘅彌敦道，抬頭一望特別有Feel。筆者嘅乖女每次上車，都爭住要按紅色嘅引擎啟動掣，其實唔只佢，筆者都覺得呢個設計係幾過癮、幾好玩。

後排空間變大咗

MINI Cooper S 5-Door多咗兩道門，唔只出入方便咗，原來車廂空間都有唔同，車身長度及軸距就比三門版分別多咗15mm及72mm，受惠嘅主要係後排乘客，即使未能完全解決到三門版嘅頂腳問題，不過只要你唔係韓妹咁款個個都係長腿族、九頭身，自會發現後排空間的確鬆動咗，呢次測試就試過安排一男一女加埋一小童坐後排，最高嗰位身高175cm，呢個組合由上車到落車都冇投訴土地供應不足，吖唔係，係空間供應不足。至於車身變大咗，理應車重都會多咗，耗油量有冇借勢增加？今次試車為期三日，總共行咗350km，根據中控台嘅多媒體屏幕顯示，平均耗油量係6.9L/100km，以目前油價計算，油費$1/km左右，以2.0L Turbo車嚟講，已經好慳家。