深不可測 Audi S6 Avant

旅行車一定係單純嘅實用派？未必，起碼奧迪（Audi）S6 Avant就係例外，4.0L V8 TFSI雙渦輪增壓引擎嘅力量表現，追貼超級跑車，馬力與扭力分別去到450hp及56.0kgm，只需4.6秒就完成0-100km/h，加埋跑格十足嘅前排座椅，置身其中，完全明晒何謂深不可測。

Audi ultra車架剛性高又夠輕，而且車身高度比A6 Avant矮低咗20mm，攻彎更加清脆利落。

中控台布局工整又簡潔，最搶眼當然係上層嘅大型屏幕。

天窗面積佔咗車頂接近2/3，令車廂更見開揚。

乘坐空間與Sedan版本相若，就以後排為例，Head-room與Leg-room都相當充足。

五座位布局之下，車尾都有565L置物量，實用度可見一斑。

大大力又識慳

駕駛S6 Avant，快感其實與四門版嘅S6 Sedan相差不遠，皆因引擎與傳動規格不變，正如上文提及引擎力量澎湃之餘，七前速S Tronic波箱嘅反應亦敏捷有勁，選用D波行車，當轉數接近2,000rpm，Turbo就會即時介入，加速分外有力，而且就如其他奧迪高性能車款，S6 Avant備有Audi Drive Select，設有五種駕駛模式選擇，選用Dynamic的話，供油與波箱嘅敏感度都會顯著提升，令加速變得更強悍。好玩之餘，耗油量未有借勢放肆，透過高效節能汽缸管理系統（Cylinder On Demand），無論任何駕駛模式之下，只要轉數及車速保持穩定，就會自動暫停其中四個汽缸運作，藉此減少耗油量，配合Start-Stop System引擎自動熄火系統下，耗油量可低至9.4L/100km的平均油量。

跑格本色出晒面

S6 Avant嘅動感表現，唔只性能，內外裝潢都令人雀躍。先講車身，All-Weather Light全天候頭燈內藏LED日間行車燈管，仲有粗框六角形鬼面罩，加埋頭泵把兩側嘅大型入風口，一般旅行車邊有佢咁惡形惡相，再睇埋20吋多幅式合金輪圈，以及車尾嘅雙出四尾喉，進一步建立重甲形象。車廂方面亦亮點多多，中控台布局唔只具層次感，連埋波棍台仲用咗唔少碳纖飾板，有跑味之餘也不失實用性，事關車尾標準置物量達565L，收起後排就可以擴充至1,680L，貫徹旅行車大吞吐量嘅本色。