獵人輓歌　HT 1/6 Boba Fett

喺「星戰」嘅世界中，唔少角色都係由二打六變成最佳男配角，R2-D2及C-3PO如是，Boba Fett就更加經典，原先只係喺EP4客串過場，不過因為造型突出而大受歡迎，結果EP5及EP6都加重戲份，成為粉絲心目中繼Darth Vader之後，最多Like、最入腦嘅奸角之一。今年大舉發動星戰計劃嘅Hot Toys，主腦Howard講明會出齊所有主要角色，Boba Fett又點會缺席？

頭盔有明顯凹陷位，甩青塗真又夠晒逼真。

行走江湖嘅Boba Fett，點只得一支EE-3傍身？前臂仲有Dur-24 Wrist Laser，槍槍攞命！

胸甲微曲似足戲服，留意右肩嘅辮子都做埋，若然辮子都有舊化處理就更入戲。

火箭背包都有舊化塗裝，噴嘴仲可以加裝火燄特效組件，扮成飛行形態。

護膝兩邊裝咗繩鏢發射器，袋中仲有Survival Knife等小道具，製作團隊嘅認真程度可見一斑。

Figure高約30cm，全身有超過30個關節，擺開槍甫士又點會有難度？

連Predator及Alien都難佢唔倒嘅Joseph Tsang，今次操刀製作沙蟲地台，像真度絕對冇令人失望，而且有驚喜，觸鬚內藏鐵線，畀玩家隨意任扭。

除咗Darth Vader及Stormtropper，Boba Fett應該係出得最多玩具嘅星戰奸角，頭像、半胸像、3.75吋、Bearbrick及LEOG等不計其數，就連1/6 Action Figure，日美兩大台柱—Medicom及SideShow亦都好捧場，只可惜兩者嘅製作質素都未盡完美，例如SideShow嘅胸甲太平坦，Medicom就頭大身細四肢瘦削。等了又等，終於等到HT出手，後者又能否為各位星戰迷還原一個似樣嘅1/6 Boba Fett呢？

努力還原缺陷美

其實HT喺去年Toy Soul已經發表咗1/4 Boba Fett，有此先例，如今加推嘅1/6理應精益求精吧！今次嘅1/6 Figure以EP6《Return of the Jedi》為藍本，Eden a.k.a 205負責塗裝美指，Lok Ho主力上色及舊化。筆者上過HT Office睇試辦，頭盔、胸甲及武器線條統統拿捏準確，微彎嘅護甲造型，加埋頭盔有凹陷又甩青，戰損效果顯著，將戲服中嘅種種瑕疵還原出嚟，Die Hard粉絲就係要呢啲「缺陷美」嘛！其他細節亦都一絲不苟，例如手臂護甲塗上紅色，而非EP4嘅綠色，又有披風、長靴及辮子等配飾，每個Detail位都似模似樣，睇得出HT嘅製作團隊一定刨咗無數次Blu-ray兼參考書，先至有依家巨細無遺嘅成果。

沙蟲地台夠入戲

1/6 Boba Fett高約30cm，關節總數超過30個，而且比例上力求跟足電影人設，並冇為咗唯美而肆意改動，務求令死忠派嘅星戰發燒友滿意，例如電影中嘅造型，其實有啲頭大身細，HT 1/6版本亦都照跟，稍為稱得上嘅瑕疵嘅就係頭盔與上身距離太近，視覺上好似變咗冇頸，期待大貨時可以稍作改良。配件方面，就有火箭背包、EE-3 Carbine Rifle、Dur-24 Wrist Laser及七款造型手掌；畀多少少錢可以升級做豪華版，追加由原型師Joseph Tsang操刀嘅Sarlacc沙蟲情景地台一個，以及一對畀火箭包部用嘅噴射火燄部件，將Boba Fett被沙蟲捉住吞落肚嘅一幕重演出嚟，惡人自有惡人磨，一路好走喇Boba Fett！