力的表現　Volkswagen Polo TSI BMT Comfortline

一部容積只有1,200c.c.嘅車仔，邊有力呀？我初時都係咁諗，不過自從借咗Volkswagen Polo TSI BMT試咗三日，真心發現細c.c.都可以好有力，滿載上斜都唔會變龜速，原因有Turbo幫手，更重要係導入「BlueMotion」節能技術，唔會因為加咗Turbo而變得「大食」。老老實實，呢次試車都幾唔留手，儀錶板顯示嘅平均耗油量係5.9L/100km，以目前油價計算，油費唔到$0.9/km，車價又只係$163,880起，加埋歐洲車嘅品牌效應，對於揭背小車嘅粉絲嚟講，好難Say No！

細容積引擎加咗Turbo，好力之餘，油費低於$0.9/km，夠吸引未？

將智能手機與藍芽系統連接，就可透過輕觸屏幕打電話，仲可以聽埋個人Playlist。

前後泊車輔助感應屬於標準配置，透過5吋屏幕顯示相關圖像，睇位泊車易掌握。

喺五座位布局下，車尾底板可按需要揭起，甚至成塊抽起收喺尾箱底部，以此獲得額外嘅儲物空間。

七前速DSG波箱備有S檔，一經啟動，動力系統會有更敏銳嘅反應。

附設儲物箱嘅前排中央扶手，舒適實用二合一。

紮實嘅底盤組合，拐彎靈活又穩陣，好玩指數唔會差過同門Golf。

1.2L TSI引擎低扭力強，16.3kgm峰值扭力早喺1,500rpm全數到位。

今代Polo有Trendline及Comfortline雙版本，今次就試咗Comfortline，兩者唔只動力規格，連安全設備都一樣，標準裝備就有電子循迹控制系統（ESC），將防鎖死煞車、循迹控制、電子防滑差速及引擎扭力控制集於一身，又有特別開發嘅多重碰撞制動系統（Multi-collision Brake System），安全配套絕對係同級之最。兩者嘅最大分別在於車廂裝潢，Comfortline嘅設備更齊全更「接地」，除有泊車輔助感應器及5吋彩色觸控顯示屏，又有16吋輪圈、前座中央扶手連儲物箱、天窗、藍芽系統及USB插頭，夠晒實用。

上斜只需半油門

筆者本身都係揸Polo，不過係2005年版本，往往上斜都要將油門踩得好深先夠力，今代唔同晒，就算引擎容積由1.4L改為1.2L，但係多咗Turbo，配合七前速DSG波箱，滿載之下半油門都足夠應付持續上斜嘅域多利道，而且峰值扭力16.3kgm早喺1,500rpm已經全數到位，運作又暢順寧靜，並冇半點拖泥帶水，夠爽快，0-100km/h都只係要10.8秒，燈位起步絕對有力跑贏1.5L NA車款。除此之外，喺同級選擇之中，Polo嘅車架剛性高幾班，底盤又紮實，無論拐彎靈活性以至高速穩定性，都保持德國車嘅高水準。

油費唔使$0.9/km

多咗Turbo會唔會「大食」咗？唔覺喎，原因係有BlueMotion Technology節能技術做對沖，加埋引擎怠速自動熄火系統及制動能量回收模式，做足慳油工夫。今次試足三日車，合共行咗220km左右，走勻港九新界，最遠由大埔去到數碼港，又試過多次喺紅隧塞餐死，連日嚟冷氣照開，還車時儀錶板顯示嘅平均耗油量係5.9L/100km，計計數，油費唔使$0.9/km，香港油價一向識升唔識跌，呢個數字一定吸引到好多車迷！