Xperia M5 Dual熱爆下海

雖然已經立秋，但天氣持續炎熱，日日三十幾度真係想「噗」一聲跳落水！不過講到玩水，除咗水泡沙灘波外，點少得一部防水手機呀！Sony Mobile新機Xperia M5 Dual就殺入水着界，唔單止防塵防水，影相仲又快又遠，加埋AR面具等爆趣「分唇」，用佢影Model，對方都話可以性感啲！

一體成型機身帶點Z3+影子，並搭載5吋全高清屏幕。 $3,698

機底貫徹系列簡約風格，主鏡頭高達2,150萬像素夠誇張！

前置鏡頭都有1,300萬像素，不過若有埋補光燈就更好！

雙SIM卡及記憶卡有獨立托盤，毋須共用一槽。

音量掣可用作變焦，旁邊的電源掣微微凸起亦相當好撳。

用Clear Image Zoom技術Zoom埋鴨仔度，過程快而流暢，放大後亦見實淨清晰，比一般數焦Zoom好得多！

「AR面具」大玩變臉，靚女隨時變貓樣，過癮！

美顏Mode當然唔少得，仲可以美白、柔膚，或者變古銅色呢！

機身容易過熱，所以不時要畀佢「冷靜」下！

「Face in Picture」可以人同景一齊入鏡，打卡必備！

《AnTuTu》跑分有39,406，性能中規中距。

「AR效果」將虛擬公仔加入實景中，令人分唔出真假！

Hybrid AF技術下對焦只需0.25秒，火車頭入鏡一刻即成功對焦。

浮潛運作半粒鐘

講到出防水手機，Sony Mobile近年真係好積極，呢部M5 Dual就支援IP65/68防水防塵標準，潛入1.5米水深可正常運作30分鐘，至啱浮潛帶埋佢！而為咗防水，機身採用一體成型設計，而且外形略帶Xperia Z3+影子，例如前後都有強化玻璃加固，四周圓角以不銹鋼製造，無蓋式USB方便充電及清洗等等；不過佢就比對方更輕，只有142.6g，配合5吋1,080p芒，女仔拎上手剛剛好。顏色則有黑、白、金選擇，全部鋁合金邊框都經過拋光處理，陽光底下都咪話唔搶！

0.25秒極速對焦

落得水影相，規格自然唔差，好似Exmor RS主鏡頭像素便高達2,150萬，為目前防水機中最高。另外它又內置最新Hybrid AF混合式對焦系統，對焦速度快至0.25秒；小記以玩具火車實測，火車頭一入鏡就立刻對到焦，比其他手機起碼快成倍！此機另一賣點係5× Clear Image Zoom，聽個名就知可將遠景放大5倍。試拍模型小屋，拉近影像都保持清晰，有別於傳統濛查查嘅數碼變焦，效果抵讚！針對水中較難篤芒，機側仲加入咗實體快門掣，同時音量掣可當作變焦掣使用，水中抓拍Easy Job！

過癮「分唇」玩餐飽

香港人食碗麵都要自拍，更何況着住套靚靚三點式去沙灘玩？所以M5 Dual特別強化前置鏡頭至1,300萬像素，並跟主鏡頭一樣對應微笑快門、HDR、柔膚及全高清錄影等功能，自拍群拍都大排用場。若嫌仲未夠，其他拍攝「分唇」都夠你玩餐飽，好似「Face in Picture」可同時啟動前後鏡頭，令人同景一齊入鏡；「AR效果」將海底虛擬公仔加入實景中，大玩Mix & Match；「AR面具」則玩變臉，將另一個人或動物塊面Key到自己度，瞬間變貓樣，十個趣！不過溫馨提示大家，此機在陽光下都幾唔受得熱，熱過龍會影相失效，所以定時要畀佢「冷靜」下呀！