OKC可以話係最早開操嘅NBA球隊，而養傷咗一段時間嘅Kevin Durant亦已經歸隊復操，同步仲有佢嘅最新Signature Shoe—KD8亦都上架開售，你問KD新鞋好唔好着？佢當然係賣花讚花香。今次我哋一於嚟個實戰測試，派出本報嘅籃球狂迷YS做白老鼠來個「堅試」報告，句句都係由衷真心話，信得過！

KD8 V8 $1,299

測試員檔案
稱呼︰YS
籃球年資︰20+
位置︰得分後衞
偏好鞋款︰幾靚都好，保護性先係王道，易拗柴嘅一定唔着。

經過長達六小時以上嘅實戰測試，YS認為KD8喺舒適度同靈活性方面都有好高評價，坦言如果後掌嘅Zoom Air再加厚少少就更加Fit。

現已上架的鮮紅色KD8 V8，配色靈感來自KD的Camaro跑車。

為咗令腳掌做到能屈能伸，故此前、後掌都加設凹槽，藉此增加鞋底嘅屈摺能力。

鞋底嘅密集紋理與Kobe 10相似，抓地能力絕對出色，不過以紋理嘅深淺度嚟講，打街場嘅耐用性有所保留。

作為KD嘅Signature Shoe，唔只鞋舌正面有佢嘅個人標誌，鞋墊仲有簽名字樣作為個人化點綴。

Flyweave鞋面唔只夠輕夠薄，而且質料較為軟身，令腳掌活動更自如。

鞋面雖薄，但鞋身兩側都落足Flywire，支撐能力不成疑問。

繼KD6 Elite之後，KD8又用上Zoom Air，而且覆蓋面積更大之餘，氣墊構造亦有所改良，緩震更強、反應更快。

KD8嘅外觀，以劍齒虎為設計靈感，所以鞋尾嘅穩定裝置設計成劍齒模樣。

先嚟個引言，KD8延續以往多代嘅低筒傳統，不過睇賣相，似跑鞋多過籃球鞋，事關佢係Nike Basketball首個有齊Flyweave鞋面及Zoom Air氣墊嘅鞋款。Flyweave係剔牌最新嘅工程織物技術，可以配合籃球嘅多樣性步法，無論起跳、突破、後撤步或加速等動作都對應得到，而且結合前掌嘅Flywire，有力鎖定腳掌之餘，又似腳背上嘅第二層皮膚般貼腳自然。至於Zoom Air用咗全掌式設計，內藏數以千計嘅高強度纖維，撐起氣墊嘅上下兩端，令整片腳掌都感受到靈敏嘅緩震反應之餘，氣墊嘅前、後位置仲設有凹槽，讓腳掌可以自由屈曲，令步伐變化更自如。

老老實實，以上資料都係嚟自剔牌嘅官方公布，到底信唔信得過？早前YS就幫手着起KD8，上咗三堂Training再加一場實戰比賽，合計着咗至少六個鐘，全程並冇就住嚟試，急停、Jump Shot、橫切等等大動作都做齊（有片為證，歡迎去on.cc或「東網生活」Facebook專頁睇真啲），現在就睇吓KD8好唔好着先？

Flyweave以柔取勝

Ｓ：The Sun　Ｙ：YS

Ｓ：之前有冇着過KD系列？相比之下有咩分別？

Ｙ：我之前未有實質着過KD系列打波，不過都有去鞋舖試着過，我覺得KD8同以前咁多代相比，前掌闊番啲，對亞洲人嘅腳形嚟講，係會舒服好多（編者按︰筆者着過KD5及KD6，鞋籠都有偏長、偏窄嘅現象，據聞KD本人嘅腳形正係如此，故此以往幾代嘅KD真係幾蝦亞洲人着）。

Ｓ：KD8嘅鞋面換咗新物料Flyweave，官方就話有好大改進，到底Work唔Work？

Ｙ：Work呀！因為早幾年好多籃球鞋用咗類似膠質嘅物料，搞到鞋面冇彈性，着落冇咁舒服，但係今次改良咗，着落舒服啲，唔會覺得鞋面夾住對腳，而且Flywire都用咗幾年，都Lock得對腳幾好，所以我覺得KD8嘅鞋面設計係幾唔錯。

Ｓ：今代改用全掌式Zoom Air，好咗定差咗先？

Ｙ：全掌Zoom Air梗係好啦，反應快！其實KD系列以前都出過全掌Zoom Air（編者按︰KD6 Elite），今次再做，甚至乎Zoom Air面積大過鞋底，緩震表現更加全面。再深入啲嚟講，我覺得前掌嘅Zoom Air就好夠了，後掌稍嫌有少少唔夠，不過我諗呢個配搭可以Fit番一啲速度型快攻球員嘅需要。

繼續低筒冇有怕

Ｓ：好多人覺得低筒鞋安全度不足，今代KD又係低筒，真心講，靠唔靠得住？

Ｙ：好多人都會驚着Low Cut鞋易拗柴，但係KD8嘅鞋領包厚咗，加上Zoom Air做闊咗，其實反嘅機會細咗好多，我就覺得大家唔需要擔心拗柴嘅問題，因為保護性都好足夠。

總結︰放低矛盾成見

最後筆者問YS，以10分做滿分，佢會畀KD8幾多分，佢答「9分」，識佢都有10年，從佢口中畀到咁高分嘅鞋款，五隻手指數得晒。筆者感受更深嘅，係以前嘅籃球鞋為咗加強支撐性，鞋身用料與構造愈變愈厚；依家因為材料開發上嘅突飛猛進，單一物料已經有同等，甚至更高嘅支撐性，從此實現輕量化，貌似跑鞋嘅KD8就係例子。既怕重，又嫌薄，好難服侍啫！雖然筆者少打籃球，但係經常着剔牌嘅跑鞋練跑，當中包括Free 3.0 Flyknit及LunarGlide 7，佢哋都用咗Flywire，實試感受真係好撐得！所以KD8似跑鞋，並非缺點，反而係優點，代表咗保護性與輕量化並重，何樂而不為？

查詢︰2520 0771（灣仔莊士敦道Nike Basketball Store）

文︰Dick　攝︰Homan