大英雄，唔一定個個都昂藏七尺、高大威猛，好似傳咗好耐、今年夏天終於登上大銀幕嘅《Ant-Man》，小個子大本事，以螻蟻之身拯救世界，為Hit咗多年嘅Super Hero電影熱潮帶嚟新鮮感。身為Super Hero，又點會被Hot Toys錯過，與電影同步發行嘅1/6 Ant-Man，雖然唔似電影咁樣可以縮細，但係造工絕對精細，淨計頭盔塗裝已經值回票價，以為動漫節過後銀包可以止血？想得太早了！

＊ 圖片所示為試辦款式，與正式推出版本或有若干分別。

戰衣質料做足功課，紅色位置有凹凸紋理，黑色部分有仿皮效果，像真度難以挑剔。

以往嘅HT頭雕，都係發光款式與真人面相獨立製作，今次Ant-Man則二合為一，據知揭起面罩就會見到真人面相，期待HT早日完成Paul Rudd嘅靚仔Look畀大家睇。

看似長靴嘅設計，其實靴筒與腳掌係分件處理，減少對可動性嘅影響。

Ant-Man其中一項設計特色，就係頭盔與背包有一對電線相連，HT 1/6版本自然要跟足。

頭盔雕工與塗裝都有高水準演繹，展現具說服力嘅舊化效果。

附件唔算多，除咗地台及造型手掌，就到圖中嘅小道具。

HT早已預告會出埋Ant-Man嘅死對頭Yellowjacket，仲會精心打造佢嘅戰鬥背包，令人高度期待。

舊化塗裝見功架

HT 1/6 Ant-Man高約30cm，活動關節有30個，以及七款造型手掌，基本嘢嚟啫，冇特別，其實今次作品勝在「頭頭是道」。與Iron Man相比，Ant-Man同佢一樣都係又要威又要戴頭盔，不過Ant-Man嘅造型Old School得多，尤其是頭盔設計，唔似Iron Man咁平滑簡潔，反之層層疊嘅構造就複雜得多。HT 1/6版喺雕工以至塗裝上都忠實還原，例如頭頂以至後尾枕嘅多片式造型，層層相連，似足螞蟻嘅身體表層特徵，而兩側嘅觸角連耳位都有細緻雕工，而耳位與背包就有幼線連接，跟足電影設定；塗裝方面同樣有說服力，啞色嘅銀色塗裝，展現出陳舊嘅金屬質感，而且污迹以至風化等舊化塗裝亦有準確拿捏，加強歲月留痕嘅效果。雖然暫時只有頭盔造型嘅官圖公諸於世，但據HT表示，現正趕工製作真人面相頭雕，不過並非以往嘅雙頭雕做法，而係揭起面罩就會見到真人Look，至於頭雕嘅雕功與塗裝分別由Kojun及JC. Hong操刀，呢對組合絕對係信心保證，令人高度期待。

戰衣質感冇得輸

主體方面，紅黑戰衣唔只做足舊化塗裝，質感處理亦都落足功課，尤其是紅色表面做足凹凸紋理，而黑色部分就有仿皮嘅平滑效果。細心嘅話，仲會發現看似一體化嘅黑色長靴，其實靴筒與腳掌用咗分件式組合處理，像真之餘，又可以避免一體式長靴削弱足踝可動性嘅老毛病。至於配件方面，由於Ant-Man成齣戲都係打拳頭交，唔會動刀動槍，故此貴精不貴多，隨盒附有兩枚長方形炸彈、圓盤形嘅變大縮小道具，以及四支化學容器。想玩重裝Parts嘅話，惟有寄望死對頭Yellowjacket快啲出了。

HT 《Ant-Man》 MMS308 1/6 Ant-Man

預訂價：1,430（Toy Hunters VIP可享九折優惠）

推出日期：明年第一至第二季

網　　址：www.hottoys.com.hk

Facebook：www.facebook.com/hottoyssecretbase

查　　詢：3722 3988（旺角彌敦道信和中心20樓Secret Base）

文︰Dick（圖片由Hot Toys提供）