NB回歸 自創入球方程式
早前我哋介紹過利物浦由2015-16球季開始，波衫改投New Balance陣營，NB連足球都玩埋？唔使O嘴住，點只波衫，連波Boot都有，仲要打孖上—Visaro與Furon就剛剛抵港上架，前者專為中場球員而設，身負「Make Chances」大任；後者屬於前鋒恩物，以「Take Chances」為使命；機會由我創，仲要把握到，如果球隊有齊Visaro與Furon嘅用家，何愁冇波入？
New Balance Visaro Pro FG $1,200
鞋釘以三角形為主，留意紅色區域改用六角釘，增加轉身嘅流暢度。
Ariaprene鞋面經過精心設計，透過唔同紋理嘅控球區，增加First Touch與長傳時嘅準確度。
鞋墊用上Fresh Foam，緩震與回彈兼備，六角形紋理就有防滑功效。
New Balance Furon Pro FG $1,200
為咗提升速度，Furon嘅鞋釘數目較少，而且全屬容易起步嘅三角形設計。
鞋身中段加設FantomFit，藉此加強支撐力，不過質地偏硬，影響咗貼腳度及舒適性。
Fruon所用嘅REVLITE鞋墊，雖然薄身，但係真心講，緩震能力絕對高過唔少對手。
鞋舌與鞋身整合起嚟，帶嚟更大片嘅平滑控球面積，不過難免影響咗鞋帶區鬆緊調節嘅幅度，對腳背偏厚嘅用家而言未必適合。
作為阿仙奴中場樞紐嘅艾朗藍斯，係Visaro嘅頭號代言人。
經常快放疾走嘅贊奴沙，與標榜輕量化嘅Furon堪稱絕配。
NB踩入足球界，對好多人嚟講係新鮮事，其實只怪少年你太年輕了。早喺上世紀80、90年代，NB已經推出自家嘅波Boot、波衫，想當年仲搵嚟如日中天嘅英格蘭Icon白賴仁笠臣（Bryan Robson）做波Boot嘅生招牌，不過踏入90年代中後期，由於業務重心調整，自此NB淡出綠茵場，直至今年二月，NB正式宣布強勢回歸，唔只搞掂咗利物浦、史篤城、西維爾、波圖及些路迪等歐洲球會嘅球衣合約（國家隊方面就有哥斯達黎加及巴拿馬），仲推出埋風格各異嘅新波Boot Visaro與Furon，代言球星主攻英超陣營，例如阿仙奴嘅艾朗藍斯（Aaron Ramsey）、曼聯嘅費蘭尼（Marouane Fellaini）及曼城嘅拿斯尼（Samir Nasri）都係Visaro嘅用家，而Furon就有曼城嘅拿華斯（Jesus Navas）及曼聯嘅贊奴沙（Adnan Januzaj）。
雙線波Boot定位清晰
到底Visaro與Furon有幾唔同？先講Visaro，佢係專為中場球員而設嘅鞋款，針對佢哋經常要先背向對手攞波，控球後就要迅速嚟個180度轉身再隨即分波上前，故此鞋底採用分區設計，前掌內側劃分為Medial Pivot Zone，係轉身動作嘅支點，所以用上轉向靈活兼抓地力高嘅六角形鞋釘，至於前掌外側以至後掌就用上穩定性高嘅三角形鞋釘。另一方面，NB為Visaro特製咗Ariaprene鞋面，僅厚4mm，由內到外已經包藏咗反絨織物、高強度網布、蜂巢狀記憶海綿及TPU熱熔薄膜四種物料，集合防水、輕薄、貼腳及增加控球摩擦力等優點，尤其是後者，因為鞋頭、整個鞋面外側以及鞋面內側後段位置布滿六角形嘅凹洞，First Touch時有卸力作用，減少控甩腳嘅機會；鞋面內側嘅前段位置，經常用嚟斬波長傳甚至落篩，於是改為斜紋坑位，見出NB嘅設計非常細心周到。
至於專為前鋒而設，尤其是速度型射手嘅Furon，鞋面物料與Visaro相近，但係構造上更輕更薄，而且表面平滑得多，尤其是將鞋舌與鞋身內側整合為一塊嘅設計，藉此做出大片嘅平滑控球區，增加盤扭時嘅靈活性。鞋身薄咗、輕咗，品牌於是作出補強，喺鞋身中段兩側設有FantomFit熱熔薄膜，有如肋骨嘅布局加上韌度極高嘅纖維，加強鞋身嘅支撐力及穩定性。鞋底方面，針對直線加速需要，所有鞋釘都用咗容易起步、話去就去嘅三角形設計，而且出於輕量化考慮，後掌只設一對鞋釘，比起Visaro少咗一對，而且有一條明顯凸出嘅骨位連結前後掌，加強對腳掌嘅承托。
跑鞋技術融入其中
鞋款定位清晰之餘，筆者最欣賞嘅地方，係NB將自家最擅長嘅板斧放入今次嘅波Boot設計之上。傳統以來，為咗貼地、低重心，波Boot中底都力求精簡，好少會加設緩震物料，NB就聰明地將中底與鞋墊整合起嚟，用自家跑鞋最新嘅中底物料製成，Visaro就選用緩震與回彈俱佳嘅Fresh Foam泡綿物料，大大增加舒適度，Furon就改用功能相近，但更薄更輕嘅REVLITE。除此之外，Furon嘅鞋尾亦都向跑鞋取經，用咗韌度高又夠輕嘅纖維網布製成，對於既愛踢波，又愛跑步嘅運動迷而言，應該會對Furon再加印象分。
查詢︰2338 0320 （中環德己立街業豐大廈New Balance）
文︰Dick 攝︰Paul
