或者你嘅母親大人，甚至女友/老婆都問過︰「乜你咁大個人仲玩玩具呀？」自甘入魔做Kidult，除咗因為貪玩，其實更大原因都係童年回憶作祟，只要係同道中人，相信你都好想搵番童年玩過，但已經失去咗，依家耿耿於懷、念念不忘嘅恩物吧！本地品牌Ori Toy正正係大家腸裏面條蟲，最近推出嘅「Green Jeep + Green Commander」，絕對可以勾起唔少大男孩嘅共鳴吧！

武裝附件十分豐富，備有手槍、步槍、火神炮及火箭炮，配合「酸雨」Figure關節位多特別好扭嘅優良傳統，大把甫士任你擺。

唔只商品主體，就連包裝都似足當年模樣，透明膠袋加上紙牌封口，Retro指數滿分。

偷空式嘅車底，加上鐵條式嘅車柱，與昔日嘅吉普車玩具一模一樣。

成個車身都以一件膠件倒模製成，似足當年嘅吉普車，不過尺寸就大好多。

就如Sol Commander，隨車附上嘅綠兵都可除下頭盔，變成兩種面相。

Ori Toy《Acid Rain》Green Jeep + Green Commander（Show Exclusive 15-16）
建議零售價︰
$398

單色設計原汁原味

身為爸打，細細個一定玩過「綠兵」呢種玩具吧！每袋裏面有多款唔同甫士嘅塑膠士兵，仲有吉普車、坦克，統統都係簡簡單單綠色一個Tone，佢哋比起氣槍及《Call of Duty》，更早成為大家接觸戰爭嘅玩物。出開《Acid Rain》Figure系列嘅Ori Toy，就將「酸雨」嘅精工細作及科幻特色，與傳統綠兵結合起嚟，炮製出「Green Jeep + Green Commander」。顧名思義，Boxset附有兩大主件—吉普車與指揮官，無論人與車都刪去咗《Acid Rain》向來好重手嘅舊化塗裝，除咗綠色，兩者就再冇第二種顏色了（吉普車嘅黑車車轆除外）。

古法炮製吉普車

顏色夠Retro之餘，吉普車嘅做工亦刻意復古，成部車以一件過嘅硬膠製成、偷空嘅車底、鐵條式嘅車軸，仲有可以放平嘅擋風玻璃框，以及拆得出嚟嘅後備車轆，正正係我哋細個所玩嘅吉普車特色所在，不過車身造型絕非倒模Copy，改為《Acid Rain》嘅未來化設計，線條與細節複雜得多。至於士兵Figure就以前作Sol Commander為藍本，面罩、頭盔連破片衣等裝束，似足現代化嘅特種部隊裝束，現代化嘅輪廓換上懷舊味濃嘅全身綠色Look，冇咗以往《Acid Rain》嗰種實戰Feel，換嚟一份懷舊行先嘅玩味風格，以新面貌重溫舊日回憶，聽落好矛盾，其實Work喎，Ori Toy果然好橋！

銷售點：旺角煙廠街31號2F 玩具螞蟻

文︰Dick　攝︰Paul