當「聖衣神話EX」都出埋《黃金魂》篇章,照計已經出到八八九九嘅「聖衣神話」系列,都係時候功德圓滿光榮告退……咁易畀你估到,佢就唔係Bandai啦!最近B記失驚冇神宣布「聖衣神話」仲有新嘢出,而且真係估你唔到,竟然係從未商品化嘅天箭座德里密(Sagitta Tramy),佢係乜水?記唔記得沙織同青銅四小強初到雅典聖域,就畀教皇派出嘅刺客暗算,兇手係德里密囉!多得佢,星矢成班人就要喺12個鐘頭內打勻黃金12宮,索氣過追巴士,否則捉唔到教皇出嚟,黃金箭就會貫穿沙織嘅心臟,咁就神仙都救唔番。雖然天箭座喺故事中有其關鍵性,不過老老實實,佢嘅人設實在一般,而且出場只得一集,嚴格嚟講只係幾個鏡頭,同屬白銀聖衣,但係人氣度就比蛇夫座、英仙座及天鷹座等差得遠。不過世事冇絕對,既然「娃娃舜」都可以紅得番,點解唔畀次機會天箭座呢?自問係超級Die Hard嘅聖鬥士粉絲,依家就可上網預訂了,預計今年12月派貨。

訂購網址:http://www.p-bandai.hk