「熱血心中火般旺，將胸懷照亮！晚霞半天映金光，金光照背上！」自問三字頭，甚至四字頭過外嘅動漫迷，應該記得《高迪安》嘅歌詞啩，依家喺YouTube睇番當年嘅OP，仍感熱血沸騰。想當年由日本「龍之子製作」出品嘅《黑豹鬥士高迪安》，寫實角色風格大走外國美形路線，最過癮莫過於其三段式「合身」設計，比起Iron Man Hulkbuster行早好多年。點解筆者無端端提起呢套老餅卡通？事關本地薑「ES合金」嘅Q版高迪安已經上市，毋須換件，又唔會影響活動能力之下，完美實現合體設計，童年回憶返晒嚟！

ES合金《黑豹鬥士高迪安》
建議零售價：¥9,333

主角大瀧與跟班黑豹，造型小巧的骰，加埋底座方便Display。

高迪安嘅「俄羅斯套娃」合體設計，唔只喺當年一鳴驚人，就連之後嘅《天威勇士》都深受影響。

打開Protteser頭部及揭起胸甲，就可將細小嘅大瀧放入去。

扭開手腕，就可發動機關炮，呢項Gimmick都跟到，睇嚟Luk.K一定係高迪安嘅超級粉絲。

拆走高迪安嘅「雙耳」，並且嵌入長棍，就可變成長矛。

揭起大腿前甲，就會發現內藏飛彈。

跟同系嘅天威勇士一樣，高迪安可以換上令雙眼LED着燈嘅黑色素體。

高迪安嘅「合身」玩法唔只令相關玩具產品大熱賣，當年嘅解構圖亦成為粉絲嘅珍藏恩物。

故事中主角大瀧要「大」字形套入Protteser體內，先至開始三段式變身過程。

或者有唔少90後未聽過高迪安嘅大名，故此花少少篇幅嚟個前文提要。喺1979至81年於日本首播嘅《黑豹鬥士高迪安》，隨後喺港台兩地都有播放，故事以美國西部為背景，主角大瀧為咗抵抗外星人毒魔黨侵略地球，於是着起強化服變成「足球王Protteser」，繼而再合體成最強機械人「高迪安G」，集合「英雄變身」與「機械合體」兩大Gimmick，創造出「俄羅斯套娃」般多重套入嘅「合身」變身概念，夠晒破格，無論動畫以至合金玩具都極受歡迎，甚至86年播放嘅《天威勇士》亦都明顯「抄橋」。

的骰三段變

ES合金高迪安由本地設計師Luk.K炮製，嵌入式玩具變法跟前作ES合金天威勇士相似，核心係勁似美式足球員、體形最的骰嘅「足球王Protteser」，雖然細細隻，但係四肢依然可動，又有一把欖球狀嘅「綠光劍」，仲可以靠換件變出兩種刀刃形狀，廠方仲炮製埋相同比例嘅主角大瀧及黑豹，只要揭開Protesser嘅胸甲，就可以直接將大瀧Figure放入去「變身」。至於紅白色嘅中型機械人「神劍鬥士Delinger」，就有赤光劍及戰斧跟手，由於要顧及可動及合體需要，機體內藏多組延伸Ball Joint，可動性係三款機體中最高，變身方法同樣簡單，只要揭起頭罩，並且拆走紅色胸甲就成事，不過留意兩邊膊頭要扭至露出凹位Ball Joint，先可以將Protteser嘅拳頭塞入Delinger體內玩變身。

武裝夠齊全

最後嚟到最大隻嘅高迪安，亦係三者中最墜手，事關整個胸腹外甲連腳掌都係Diecast製作，夠晒足秤，而且膊頭及小腿嘅活動關節都有螺絲加固，故此套入Delinger之後都唔會影響可動性，不過筆者窩心提示咪用蠻力扭動，慎防扭爆膠料。至於變形方法就要花多些少工夫，因為高迪安頭大腳長，套入Delinger之前，記得要先拉高頭部及拉長小腿。武器方面就以高迪安最多，絕招白光劍、用雙耳結合而成嘅長矛、護盾等都一應俱全，手腕仲可以轉出機關炮，打開小腿前甲又有隱藏飛彈，夠晒多嘢玩。

文：Alfred　攝：Homan

查詢：2390 9843