Samsung Galaxy Tab S2　5.6mm激薄旅伴

平板電腦向來予人笨重感覺，拎住四圍飛，的確唔係咁方便！不過Samsung 新出嘅Galaxy Tab S2就冇呢個問題，佢飛甩傳統笨重機身，厚度僅5.6mm，插入褲袋就可以帶住周圍走；而且佢仲提供2K屏幕及兼容中港4G，完全係外地遊最佳旅伴！

備有8吋及9.7吋兩個款式，照顧唔同人士需要。$3,088 （8吋Wi-Fi）、$4,088 （8吋LTE）、$3,888 （9.7吋Wi-Fi）、$4,888 （9.7吋LTE

提供黑、白、金三色，前兩者於8月4日正式發售，金色則延至8月下旬推出。

藍芽鍵盤保護套有埋觸控板，8月中推出，售$899 。

機側可插microSD卡，最高支援128GB。

最薄處只有5.6mm，比iPad Air 2仲要薄！

預載Microsoft Office及One Drive程式，後者提供兩年100GB免費儲存空間。

閱讀模式會自動調節屏幕亮度及色溫，長睇唔刺眼。

買家可獲$150 Expedia現金優惠代碼，供App內使用。

《AnTuTu》跑分有47,260分，屬中上水平，跟Note 4相若。

復古、卡通等多重濾鏡，嫌唔夠仲可下載更多。

Home掣可當作指紋識別器，進入系統就可登記指紋，最多四組。

薄過iPad Air 2

近年平板電腦勢頭大不如前，新機買少見少，難得Samsung仲積極投入市場，繼中階級Tab A後，事隔一年再出第二代Tab S系列。Tab S2最大賣點，唔使問阿貴一定係尺寸，只係厚5.6mm、重265g，比主要對手iPad Air 2嘅6.1mm及437g仲要輕薄，小記輕鬆就可插入牛仔褲後袋，猶如手機咁便攜！顏色則有黑、白、金三色，同樣設有鋁合金邊框，形象高貴，當中金色罕有地用咗啞面，雖然冇S6土豪金咁搶眼，但睇落相當沉實穩重，相信都會受歡迎。美中不足係機側有點（界）手，幸好重心分布尚算平均，長拎都唔怕手仔痠痛！

2K屏幕用新比例

一如上代，此平板採用2K Super AMOLED屏幕，只不過比例就從16:10變為4:3，屏幕尺寸就有8吋同埋9.7吋兩款。肉眼所見，屏幕雖略帶味精感覺，但輸出明亮銳利，直頭印刷品咁靚；加上閱讀模式能自動降低亮度及色溫，長睇雙眼舒服好多。提到相片，佢備有800萬像素F1.9大光圈鏡頭，支援雙鏡頭拍攝、HDR、全景、專業及美肌模式，並設有復古、卡通等大量濾鏡，完全滿足Selfie及龍友們需要。另外，Tab S2可配合藍芽鍵盤保護套使用，提供三種角度及觸控板，打字方便程度不遜Laptop，旅遊Blogger一定畀Like！

兼容中港4G網絡

效能方面，內置自家製Exynos 5433八核心處理器及3GB RAM，於出廠狀態下，撥頁開App反應相當快，影相對焦、存相亦見快速，至啱心急嘅香港人使用。此機備有Wi-Fi及LTE版兩個版本，前者對應802.11 ac制式；後者則兼容中港兩地3G及4G網絡，平板中好罕見，北上旅遊零舍方便。特別一提，買家可享價值$150嘅Expedia現金優惠代碼，並有機會免費住宿日本酒店一晚，詳情可留意Samsung嘅Facebook公布。