唔通《Gundam Seed Astray》嘅創作班底都睇過《天龍八部》或者《笑傲江湖》，識得當中嘅北冥神功及吸星大法？所以設計出充滿邪味嘅Gundam Astray Gold Frame Amatsu Mina（簡稱Amatsu Mina）？老實講，喺整個Gundam Seed系列之中，Amatsu Mina呢款外傳機體雖則設計獨特，但論人氣，點都比Red Frame及Blue Frame差少少，同主角機Strike Freedom Gundam及Infiniti Justice Gundam更加冇得比，但係Bandai嘅旗艦級Gundam完成品系列Metal Build，偏偏睇中呢隻黑馬，仲要落足心機製作，唔怪得成為今期少有嘅唔冧價，甚至聞到少少炒味嘅日系高價玩具。

Metal Build Gundam Astray Gold Frame Amatsu Mina
建議零售價︰¥22,000
長矛可以前伸，矛尖又可打開變護盾，可惜欠咗光束特效組件，未能傳神重現「奧津鏡」一招。

「十束劍」嘅劍身清楚印上劍名，由此可見製作認真程度相當之高。

唔只右手，就連劍盾合一嘅「三犄改」都係取材自Blitz Gundam，Metal Build版本嘅尖矛既可拔出，就連大劍都可獨立分拆出嚟。

天字標記唔只清晰貼喺機身表面，仲刻埋喺腳掌上。

根據原裝機設，Amatsu Mina嘅右臂係來自被擊毀嘅Blitz Gundam，故此出現「鴛鴦手」嘅特色設計。

雖然「禍之生太刀」背包實在太大件，不過Metal Build Amatsu Mina依然可以唔用底座都企得穩。

「禍之生太刀」嘅翼身既可作多角度擺動，內藏嘅「災禍鋏鉾」飛索可以駁上鐵線，扮成發射形態。

裝喺左手嘅「都牟羽太刀」，可以伸出三隻利爪，稍嫌延伸幅度未夠多。

無論由模型到完成品，似乎B記都有個不成文嘅傳統，就係愈冷門嘅機體，製作水準偏偏愈高，睇怕B記都係捉到大部分高達迷嘅消費心態，反正人氣高嘅主角機，就算水準一般都係唔憂賣；反之冷門款式自然要用質素搭救，務求令玩家大破慳囊。今次嘅Metal Build Gundam Astray Gold Frame Amatsu Mina正係最新例子。

用料塗裝冇得輸

雖然盒面無「超合金」呢個招牌，但係顧名思義「Metal Build」，由第一彈嘅OO Gundam到今次嘅Amatsu Mina，一直以嚟都「含金量」高，幾乎Amatsu Mina嘅整套骨架，由主軀幹、四肢到背包支架都係合金製成，平心而論，比起好多超合金更加重秤；更難得係廠方花咗唔少心機喺重量平衡上，就算裝埋大背包「禍之生太刀」，以及「三犄改」及「十束劍」等全身武器，唔用底座都一樣企得穩。至於細節設計與塗裝同樣要畀Like，唔只背包、左肩及胸口有「天」字拉花，甚至腳掌都刻有「天」字刻印；塗裝上，大部分嘅黑色位置都有鏡面效果，至於金色位置由於包括了塑膠與合金等不同物料，故此色澤就有光澤金、沙金與銅色三種，或許有玩家認為未夠統一，但筆者覺得由原裝機設嘅單一色調，化為三種唔同深淺色澤，層次感更高。

武裝豐富獨欠奧津鏡

可動性方面，Metal Build Amatsu Mina未算最突出，尤其是「禍之生太刀」實在太大，難免影響到主體四肢嘅擺動幅度，不過呢個大背包的確設計精彩，一對大翼既可合攏成為基本形態，又可向外張開、向前伸展，翼身前段還可拉出、轉動，進行多角度擺動；呢對大翼係Amatsu Mina最具代表性嘅武器，當敵機畀佢嘅翼身掂到、勾住嘅話，就會畀Amatsu Mina吸走佢嘅電能，就好似中咗北冥神功、吸星大法嘅武林高手咁樣變成無力抵抗。至於其他武器方面也相當豐富，包括裝喺右手、攻防合一嘅「三犄改」、左手嘅利爪「都牟羽太刀」、可以合體成雙刃劍嘅「十束劍」、「禍之生太刀」內嘅「災禍鋏鉾」飛索，以及掛喺左臂嘅長矛。美中不足係長矛雖可伸縮，矛尖可以打開成護盾，但係原來機設可以變成光束武器「奧津鏡」，但係隨盒就冇相應嘅特效組件，唔通B記又想留番做額外Effect Parts，日後擺上Premium Bandai網站收訂賺多筆？

查詢︰2433 1828（瑞華行）

文︰Dick　攝︰Homan