遙控玩具近年愈來愈多人玩，當中以車同飛機為主。如果玩厭以上形態嘅遙控機，Parrot嘅Minidrones系列或者可為你帶來新鮮感！此系列有Jumping、Airborne及Hydrofoil三款玩意，當中又以Hydrofoil最創新，皆因既可以喺水上航行，又可以分拆機身飛上天，夠晒過癮！

Hydrofoil $1,238

Hydrofoil採用水翼船設計，外形獨特。雖然僅重249g，但航行時相當穩定。

Hydrofoil船頂嘅四軸螺旋槳可以拆出嚟，變身Airborne四軸小型飛機。

操作介面簡單，只需控制前後左右，毫無難度。

整個Minidrones系列都採用同一款電池，兼容度高。

Hydrofoil似足一艘小型水翼船，船身體積只有32×34×14cm，大部分船身係採用發泡膠物料製造，相當輕巧。雖然輕身，不過亦唔影響Hydrofoil於水面上航行嘅穩定性，前行、轉向都相當流暢，最高航行時速可達每小時6.2公里。細心留意，Hydrofoil構造其實有別於一般水翼船，佢並非靠船尾引擎喺水面推進，而係靠擺放於船頂嘅四軸螺旋槳，當Hydrofoil前進時，四軸螺旋槳就會懸垂於船身，航行形態相當有型！

變身小飛機

呢個四軸螺旋槳原來內有乾坤，皆因佢其實可以獨立於船身，拆出來即變身為一隻Airborne四軸小型飛機，飛行最高時速更可達18公里，一機兩用，玩味大增；而且飛機上亦設有VGA鏡頭，於空中影相都冇問題。至於玩法與先前推出嘅同廠產品一樣，用家只需於Android或iOS裝置下載《FreeFlight 3》程式，並以藍芽與Hydrofoil配對，即可將手機變身遙控器。操作介面亦非常易用，唔難操控。續航力方面，Hydrofoil充滿電後可以玩到7分鐘；而且充電池支援快速充電，配合指定充電器，只需25分鐘即可完成充電。

查詢：2736 1733

文：Vincent

攝：Pen