Huawei MediaPad X2 闊芒睇片

Phablet級大芒手機向來有班忠實擁躉，皆因睇片、玩Apps視野超廣闊，睇得舒服！近來國產大牌Huawei又有新品應市，型號叫MediaPad X2，佢有個7吋屏幕，用上一系列高階硬件，定價都只係三千幾蚊，相當抵玩！

$3,280

備有7吋全高清屏幕，屏幕佔機面表面積達80%。

microUSB充電位支援反向充電，可為其他裝置供電。

支援雙卡雙待，分別採用microSIM及nanoSIM。

金屬機身，手感不俗。

跑分高達50,382分，高分過MX4、Galaxy Note 4等機款，效能超強。

內置省電模式，可以調整手機效能，減低耗電量。

用《on.cc東網》App睇新聞，再將字形調大，字體清晰，包保「老花」都睇得清楚。

試相：
以前置500萬像素鏡頭並開啟5級美顏影人，效果唔錯，不過成像唔夠實淨。

用上7吋高清芒

其實Huawei上年曾經推出同類型嘅產品，當時個型號叫Honor X1，今代改咗系列名堂，叫MediaPad X2，但賣點依舊，同樣備有7吋LTPS屏幕，解像度同像素密度分別達全高清以及323ppi，可視角、亮度都相當高。現場試吓用嚟睇片上網，視野非常闊落，睇得十分舒服。而Phablet用家最擔心一定係機身體積，MediaPad X2用咗2.99mm窄邊框設計，屏幕佔機面嘅面積達80%，亦令機身不致因太闊而難以掌握。至於體積、重量方面，MediaPad X2厚7.18mm、重249g，用同尺寸機款嚟比較都唔算累贅。

打通中港台網絡

規格方面，MediaPad X2屬於高階級別，內置HiSilicon Kirin 930八核心處理器、3GB RAM同埋32GB ROM，操作Android 5.0及EMUI 3.0介面時亦見順暢，切換Apps都好爽。一如大部分國產手機，MediaPad X2支援雙卡雙待雙通；而且兼容多個網絡制式，包括FDD-LTE、TDD-LTE、WCDMA、TD-SCDMA以及GSM，中、港、台三地嘅3G、4G網絡都用到，經常出門嘅用家實鍾意！另外，此機係用5,000mAh特大電池，續航力極長，亦支援反向充電，可為其他Gadgets叉電，非常方便。順帶一提，MediaPad X2暫時只提供香檳金色，買機則會附送價值$238嘅原廠手機保護套。