專家教路　航拍新機　雲霄獵影

近年航風勁過韓風，人人都想手執一架航拍機，翱翔天際，拍出第一身飛行所見！不過，航拍機絕非一般遙控飛機咁簡單，當中學問甚多，究竟最近有咩新型號？玩時有咩需要注意？又有咩增強補品呢？今次小記就為大家帶來三款新機，仲找來航拍達人Rickson解開背後迷思。事不宜遲，一於齊齊衝上雲霄！

Yuneec Typhoon Q500+一體成型，減低裝拆難度，但由於無得拆細，攜帶就較累贅。$8,580（普通版連一塊電池）
$9,750（專業版連鋁箱及兩塊電池）（a）

扭上旋翼就玩得，前後唔使5分鐘，方便！

CGO2三軸雲台系統，支援115°廣角，冇上代咁魚眼，畫面更真。

電池容量有5,400mAh，夠玩25分鐘。

遙控內置5.5吋彩色屏幕，飛走手機，絕冇兼容問題，畫面自然更流暢。遙控實時顯示飛行狀況及參數，並提供觸控鍵，簡化操作。

「Follow Me」模式下，鏡頭追蹤遙控器，Selfie精至愛！

試拍南生圍上空，影片夠定夠清，顏色飽滿，草地、河流及工廠盡收眼底。

另送三軸手持雲台，駁埋鏡頭就可以喺地面拍攝，一鏡兩用，抵！

DJI Phantom 3沿用元祖四軸設計，白色塑膠機身夠經典。$7,750（Advanced版）
$9,760（Professional版）（b）

改用與Inspire 1同級嘅新鏡頭，可拍4K超高清畫面。

加入視覺定位系統，可感應地面及高度，平飛懸浮更穩定。

電池有4,480mAh，畀多$770可買多塊。

遙控加入雙天線，接收距離遠達兩公里。

Xiro Xplorer V造型三尖八角，十足隱形戰機咁有型。
$5,299（c）

跟機送1,080p相機，可提升畫面，仲可以切換其他4K鏡頭。

旋翼用手扭就得，出外玩帶少樣工具。

折疊式雙角度腳架，提升升降抓地力。

遙控弧度符合人體工學，手感極佳，並提供抽拉式支架以兼容各款手機。

航拍達人Rickson，擁有英國航太工程碩士資歷及18年遙控模型經驗。

港產入門機　Yuneec Typhoon Q500+

港產Yuneec以電動載人飛機起家，人都載到，載部Cam上天空自然「Easy執」。呢架Typhoon Q500+依據空氣動力學設計，由摩打配置、旋翼到前後比例都經過航空工程考量，並僅重1,700g，使用相同電池下，可比其他機種飛得更高更耐，達到400呎高及25分鐘之久！此機另一賣點係容易上手，一體化機身只要扭上旋翼就飛得，安裝前後唔使5分鐘，方便至極！航拍達人Rickson玩後就大讚︰「架機旋翼夠大而且轉速慢，唔單止少啲噪音，飛行亦較穩定，而且佢設有Home功能，啪個掣就會自動飛返起點，唔怕玩玩吓失咗蹤！」

跟其他航拍機要駁上GoPro或相機有所不同，Q500+原生已植入CGO2+三軸雲台鏡頭，可拍出115°廣角、1,080p@60fps高清畫面。小記遠赴元朗南生圍試拍，結果發現影片穩定，又色彩豐富，而且冇誇張嘅魚眼效果，猶如鳥瞰一樣，感覺好真實！而針對Selfie一族，佢仲備有「Follow Me」模式，航拍機會自動追住遙控器拍攝，可從空中俯瞰自己，效果爆趣！遙控方面，內置5.5吋輕觸式屏幕，唔使另外裝App，就能實時傳送飛行畫面、數據及設定，傳輸距離仲遠達600米；加上有遮光罩，強光下都睇得清楚，墜機就再無藉口啦！

SPEC

鏡頭︰CGO2+鏡頭，115°廣角

拍攝模式︰1,080p@60FPS錄影；1,600萬像素相片

飛行時間：約25分鐘

飛行高度︰起飛點上400呎

視頻傳輸距離︰600米

支援記憶卡︰8GB至128GB microSD

電池︰5,400mAh

重量：1,700g（連電池）

4K航拍大佬　DJI Phantom 3

作為航拍界大佬，DJI早前就推出咗Phantom 3系列，並提供Advanced及Professional兩個版本，分別支援Full HD及4K拍攝。外觀上佢沿用經典嘅四軸機架設計，但鏡頭就改用非球面鏡組，具備94°視角，有效消除畫面變形。同時機身內置三軸雲台穩定技術，飛行時鏡頭保持穩定，加上高清視頻傳輸系統，飛到兩公里都依然收到畫面。遙控器加入雙天線，並提供拍照、錄影、雲台俯仰控制撥輪，配合兩個自訂按鍵，毋須駁手機都能應付大部分操作。續航力方面，電池「升呢」上4,480mAh，足夠飛行23分鐘。

國產隱形戰機　Xiro Xplorer V

由內地牌子Zero Tech（零度）及Rapoo合作生產，碳黑用色加上三尖八角，造型十足隱形戰機，齋講樣已靚絕航拍界；而且底部設有可折疊腳架，提升抓地力，起飛降落更平穩。鏡頭採用模塊外掛設計，可同時支援GoPro等多款相機，今次介紹的V版本附送三軸雲台同攝錄機，可拍1,080p@30fps高清影片及1,400萬像素相片，同時鏡頭可360°旋轉，任何死角都無所遁形。隨機附送5.8GHz遙控器，接收距離達1,000米，而5,200mAh電池則夠用25分鐘。特別一提，此機亦備有失聯同埋低電量自動返航功能，適合新手。