Huawei Honor 7 指紋至叻

指紋辨識是近年手機必備功能之一，最常見用法是為手機上鎖、解鎖。原來指紋辨識還有很多實用功能，好似Huawei新機Honor 7，位於機背鏡頭下方嘅指紋辨識器除咗可以鎖定手機，仲可以用嚟接聽電話、當快門掣影相等，用落超方便！

$3,188

灰色機身會配黑色機面，另有銀色同金色機身選擇。

機身用上金屬物料，手感、做工俱佳。

特設「智能鍵」，可以設定按一下、兩下或長按落指令。

支援雙卡雙待，卡槽需要用專屬卡針打開。

厚8.5mm，略嫌厚身。

前置鏡頭設有補光燈，並可調校亮度，方便自拍補光。

microUSB嘅左右兩邊為喇叭，音量輸出頗大。

最多可以註冊五組指紋，以手指頭於辨識器上反覆按壓即可完成註冊。

後置鏡頭設有美顏、美食及光繪畫攝影等多個模式，另有九款濾鏡效果。

預載EMUI 3.1介面，亦換上全新主題風格，感覺清新。

內置智能管理，可以提示天氣、手機用量等資訊。

備有《健康》App，可計算步行、跑步、踩單車嘅距離、速度及卡路里消耗量，仲可以連接指定血壓計同埋血糖計。

支援HiVoice功能，玩法似足Siri，以語音指令控制手機，但只限於普通話。

試相：提供10級美顏，試用5級美顏自拍，臉部肌膚白滑，效果自然。

Huawei嘅Honor系列一向以性價比做賣點，外形設計以至物料都並非特別講究。嚟到Honor 7竟然一反常規，由以往嘅塑膠物料改為一體成形金屬機身，感覺高貴得多，而且手機邊角順滑唔(界)手，手感舒適。新機將會推出銀、灰、金三色，而小記測試機為灰色，眼見金屬表面帶有漸變同埋反光效果，又唔會太過沉色。留意後置鏡頭明顯凸咗出嚟，平放枱面時要小心避免刮花鏡頭。

指紋辨識反應靈敏

呢部手機喺今個月初先至正式發布及開賣，唔夠半個月，網上竟然已經有超過1,400個用家評價，當中絕大多數係好評，最多用家畀Like嘅就係指紋辨識功能。Honor 7於機背鏡頭下方加設指紋識別器，用家毋須掃動手指，輕輕一掂已經可以完成認證，反應靈敏；而且處於屏幕關閉嘅待機狀態下，手指一掂就會隨即解鎖並着起屏幕，唔使事先着芒解鎖。另外，用家亦可透過指紋認證鎖定應用程式，又或者將相片、音樂、影片等檔案放入「保險櫃」，夠晒安全！除咗加密之外，指紋辨識器仲有其他功能，好似長按就可以接聽電話、停響鬧鐘又或者拍攝時當快門鍵；小記最鍾意就係「顯示通知面板」，只要於指紋辨識器上滑動，即可開啟或者關閉通知欄，輕按兩次更可以清除所有通知，單手用機都冇難度。

智能鍵夠晒實用

一如其他國產機，Honor 7推出咗多個版本，今次水貨到港嘅就係「雙4G版」，支援TDD-LTE、FDD-LTE、TD-SCDMA、WCDMA及GSM，換言之中港兩地嘅2G、3G、4G都全部啱用，網絡兼容力強。唯一可惜嘅係僅支援1,800MHz頻譜，唔支援2,600MHz頻譜，因而用唔到部分4G覆蓋，上網速度可能輸蝕啲。至於規格，佢就備有5.2吋全高清屏幕，亦用上最新嘅Hisilicon Kirin 935八核心處理器，配合3GB RAM，運行Android 5.0作業系統及廠商自家嘅EMUI 3.1介面時，撥頁反應、切換程式都非常爽快。順帶一提，機身左邊特設一個實體「智能鍵」，用家可以設定按一下、兩下或長按嘅指令，例如開啟相機、電筒、智能管理或者指定程式。