I believe I can fly，如果着咗Super.Fly，我冇吹牛呀，唔只擅長「拆你屋」嘅Blake Griffin係Super.Fly嘅忠實用家，就連「喬老大」喬靖夫都話好鍾意呢款鞋，成日着住打波，無他嘅，因為Super.Fly既符合現代嘅輕量化主流，又有出色嘅緩震與爆發力，唔只Griffin呢類重型轟炸機咁款嘅內線球員，就連注重速度與靈敏嘅外線球員亦都適用，無論你打1號位至5號位，都可以Flight得起。雖然NBA仲有三個幾月先開鑼，不過Jordan Brand已經急不及待推出咗新一代嘅Super.Fly 4，慌死你夏天嫌熱就偷懶，咁又係嘅，買咗新鞋，點會唔落場練波試真啲對鞋先？

Jordan Super.Fly 4
$1,299

Jordan Super.Fly 4 X
$1,299

Super.Fly 4用咗透明外底，可以清楚睇到前掌三塊Zoom Air嘅分割位置。

顧名思義，Super.Fly 4 X嘅外底用咗XDR物料製成，耐磨性特別高，打街場都掂。

鞋頭以至鞋身兩側都用咗紡織鞋面，輕量化與透氣兼備。

留意足踝嘅泡棉位置都加入透氣功能，設想周到。

鞋尾嘅TPU穩定器既有功能作用，外觀亦見出心思。

Jordan Super.Fly 4
”Marvin The Martian”
$1,299

成個外底用咗螢光綠，分外Sharp過人。

夏天除咗帶來美腿，仲有乜嘢好望？Marvin用望遠鏡唔係睇靚女，而係搵Super.Fly 4呀！

溫故知新，睇番上一代嘅Super.Fly 3，其中一項犀利武器就係FlightPlate，呢個中底結構可以提升Zoom Air嘅功能，加強緩震過後嘅回彈反應，故此同屬Jordan Brand嘅Melo M11及AJ XX9都有用到，就知品牌幾咁睇重呢項發明。

升級盡爆Zoom Air潛能

Super.Fly 4嘅設計師就將呢把寶刀再磨利啲，升級為FlightSpeed，將承托住前掌Zoom Air嘅Pebax緩衝板組件再作調整，進一步協調Zoom Air喺受壓前後嘅壓縮與變形狀態，加強Zoom Air嘅緩震能力之餘，仲可以提升用家喺起動或跳躍時嘅反應與速度。至於整片中底嘅主材料就由Phylon泡棉構成，唔只夠輕，仲有唔錯嘅緩震及穩定作用。外底方面採用明顯嘅前、後分割式布局，起動分外靈活，而且人字形紋理對全方位移動，都可發揮出色嘅抓地效果，讓用家放心跑、盡情跳。

泡棉Pad位夠體貼

鞋身方面，由鞋頭到兩側都用咗滿布透氣網眼嘅紡織鞋面，加埋鞋舌表面都係網布材料，喺輕量化與透氣表現上都令人高度期待，筆者至Like嘅係足踝兩側以及鞋舌底部等最貼腳嘅位置上，都加裝柔韌嘅泡棉Pad位，貼腳之餘又唔會對腳掌構成壓力，舒舒服服之下加強支撐效果，點會唔Buy？至於鞋尾嘅TPU穩定器既可進一步鎖緊腳踭之餘，表面嘅菱形紋理令向來實而不華嘅Super.Fly，嚟到今代都變得精緻咗，試問有內涵之餘，有邊個唔想要埋外在美？況且Super.Fly連鞋墊都講究過人，選用質地柔軟，並有輕微回彈作用嘅OrhtoLite製成，為咗釋放Zoom Air與FlghtSpeed呢對組合嘅潛能，可謂無所不用其極，一字記之曰︰服！

火星人都識貨

今年Jordan Brand多次以Bugs Bunny做生招牌，唔只AJ 1及AJ 7，就連Super.Fly 4都玩埋一份！話說《Tiny Toons》嘅另一位卡通人物、火星人Marvin緊隨Bugs Bunny嘅步伐嚟到地球，發現Griffin與Super.Fly 4有震撼大地嘅威力，於是Marvin四處尋找Super.Fly 4，希望將佢變成侵略地球嘅新武器—Earth Shattering（有片為證，大家可以Click入去睇睇），所以品牌除咗紅×黑與粉紫色外，同步仲加推埋深紅×螢光綠嘅特別色版本，正正就係Marvin嘅代表顏色，品牌話Marvin、Griffin與Super.Fly 4嘅故事仲有下文，AJ粉絲要買定花生等睇戲了。

短片網址︰https://www.youtube.com/watch?v=C8SQGYNO7yQ

文︰Dick　攝︰Paul（部分圖片由Nike提供）