TOMICA粉絲入場開眼界

玩具迷引頸以待嘅香港玩具節2015（HK Toys Festival 2015）昨日正式開幕了，老老實實，如果你係高達迷、拉打控，呢個Show未必啱你，不過自問係TOMICA車迷嘅愛好者，呢次玩具節一定唔去唔安樂，唔只有之前預告嘅港版紅綠小巴，最大陣仗係在港首度舉行嘅「香港TOMICA車展」，以及全港最大嘅TOMICA & PLARAIL混合情景模型，車仔迷置身其中，想唔展示心心眼都幾難！

首度在港舉行嘅「香港TOMICA車展」，展品由日本總廠空運到港，夠晒認真。

今次嘅展品橫跨1970至2000年代，好似圖中嘅70、80年代出品，睇怕好多「車迷」都未見過實物。

唔少TOMICA車迷偏好警車及消防車，見到呢兩款古董級珍藏一定雙眼發光！

T Club會員即場另加$60，就可轉動幸運輪一次，每轉一次都可以拎番一部Premium TOMICA車仔返屋企，至於抽唔抽得中心頭好，就睇閣下運氣了。

大型情景由TOMICA及PLARAIL嘅產品合組而成，將成個交通城實體化，比起《SimCity》過癮好多。

Sailor Moon S Action Series
Art Statue 001 Sailor Moon
會場價：$350

除咗Sailor Moon即場率先開售，同場仲Show埋其餘角色嘅試辦，預告《美少女》粉絲要儲定銀彈了。

World Scope嘅特別版大鐵人17號，塗裝追加光澤處理，全球限量300套，率先喺「精品」攤位開售，會場價$1,050。

唔只小朋友，其實好多大細路都係TOMICA車仔粉絲，原來不經不覺，今年已經係TOMICA 45周年了！TOMICA香港分部一於喺今次玩具展搞個大Party，同粉絲好好慶祝一番，日本TAKARA TOMY官方就專誠空運咗大量嘅經典車仔來港，促成今次嘅「香港TOMICA車展」，展品橫跨由1970至2000年代，足足40年，大部分已經絕版，大朋友嚟到可以想當年，小朋友見到亦都可以當上咗堂交通歷史課。

大陣仗交通城

除咗車展，同場仲有一個10×2m嘅大型情景模型，由TOMICA及PLARAIL嘅產品合組而成，當中唔只有TOMICA嘅車仔及建築物，仲有PLARAIL嘅電動火車、路軌、吊橋，甚至大型貨機，將成個交通城Build Up出嚟；尋常百姓如你我他，屋企邊有咁大地方砌個車仔城出嚟，玩《SimCity》就得，今次TOMICA總算一償大家心願，好此道者有乜理由唔到場先？

頭號Target紅綠雙Van

平時想買特別版嘅TOMICA車仔，唔係去到舖頭已經畀人秒殺沽清，就係要捱炒價，TOMICA就喺今次玩具節招收「T Club」會員，讓粉絲可以簡單嘅方法及合理嘅價格買到心頭好，各位「頭文字T」嘅車迷只需去到場內嘅T Club會員招募處填妥入會表格及繳付$60會費，就可享有多項入貨優惠，包括於場內嘅「TOMICA車展銷售區」購買任何TOMICA/PLARAIL正價產品有八折優惠，以及以公價$60買到TOMICA會場限定版車仔一部；至於頭號目標當然係同屬會場限定版，而且專為本地車迷而設嘅香港小巴，成功入會即送一部，可以自選紅Van或者綠Van，會員仲可以即時另加$60買埋另一部，即係話會員費加補購費合共$120，就可以儲齊紅綠小巴，據聞坊間炒價是旦一部都唔只呢個價，咁你話入會係唔係抵好多先？有言在先，話明係會場限定版，貨量當然唔多，唔想執輸行頭嘅話，你識做啦！

替月行道港產美少女首展

TOMICA以紅綠小巴大打本土牌，香港玩具迷自然受落，其實場內仲有唔少本地單位擺Show，自己人係咪要多多支持先？例如出過《One Piece》Bepo及Luffy Figure嘅Legend Studio Limited，就會喺場內嘅「精品」攤位（C1-C4，C9-12）首展自家製作嘅Sailor Moon，比起先前B記嘅出品，呢個本土製作版本嘅身形更加修長，細節更講究，尤其是水口位統統執番靚晒，無論遠觀或者近睇都順眼好多；除咗Sailor Moon，同場仲有特別塗裝嘅大鐵人17號，與Sailor Moon一樣進行全球率先開售，睇怕無分男女，只要你係玩具迷，呢次幾難唔破財。