LG G4 Stylus 追加支筆親民畫寫

延續上年傳統，LG推出G系列旗艦手機之後，必有變種版本跟尾！今次就一次過推出G4 Stylus以及G4c，當中外形似足「大佬」嘅G4 Stylus走親民價路線，追加Stylus手寫筆，至啱鍾意畫畫又或者經常記事嘅用家！

LG G4 Stylus $2,398

屏幕邊框比G4粗，設計相對冇咁靚仔。支援Glance View，待機時於屏幕向下一掃，就可顯示時間、訊息及未接來電等資訊。

設有Rear Key，單手都可以輕鬆控制音量同埋屏幕開關。

LG專利嘅Rubberdium Stylus，用上金屬筆桿，手工不俗。

可外加microSD，最多可支援32GB卡款。

內置QuickMemo+程式，可以畫畫或記事。

內置瀏覽器，以兩指向上掃即可跳至頁首，向下掃則跳至頁底。

備有雙視窗，可以將屏幕上下分割，同時開啟兩個不同程式。

G4最大賣點，相信莫過於其皮底設計，作為「細佬」嘅G4 Stylus就冇咁考究，不過機背都依然有心思。好似今次測試嘅銀灰色，帶有輕微拋光效果，而且表面壓印大量微細橫紋，手感特別，更有效防指紋同污漬，打理非常容易。除咗銀灰色，另有純白色選擇。屏幕方面，G4 Stylus搭載5.7吋芒，尺寸比G4仲要大少少，可惜係解像度下調至720p，細緻度當然冇得比，但配合IPS素材，亮度、色彩、可視角都唔錯，過關！

多用途靈敏手寫

話明叫Stylus，主菜當然就係手寫筆。此機配備LG Rubberdium Stylus多用途手寫筆，金屬筆桿、橡膠筆頭，手工不俗；而且機背左上角設有插槽，方便收藏。一如大部分LG手機，用家可以使用內置QuickMemo+程式，記事、繪畫都可以用手寫筆。試用時，觸控反應靈敏，效果比起用又粗又鈍嘅手指頭爽得多。規格方面，G4 Stylus內置Qualcomm Snapdragon 410四核心處理器、1GB RAM，兼且支援4G制式，效能僅僅合格。驚喜反而在於鏡頭部分，前後置鏡頭分別達500萬及1,300萬像素，後鏡頭更支援雷射自動對焦功能，昏暗環境對焦都極快。