雖然早前也寫過，對於香港大學美術博物館展出其收藏幾十年的所謂景教銅十字架表示極大懷疑，但也得到現場看一看，才能客觀一些吧！

一去到現場，真的嘆為觀止，令人驚嚇的程度媲美侏羅紀公園！真係要形容一下，那個聲稱全球最多收藏的「元代景教銅牌展」，他們之前又搵過記者做訪問，又搞了三天的研討會，必以為展覽好認真好有規模啦！結果是他們用四塊大板，每塊大板釘上12×8件「銅十字」，再將四塊板砌埋，然後隨便放置在牆邊位置，隔塊大玻璃，而左右兩排燈，係舞台劇化妝枱的燈，左邊中文簡述、右邊英文簡述，完！係真唔係呀？

問清楚職員，確認那些就是全部展品，吓？真係連我看過的伊拉克博物館都不如！又冇設計、又冇打燈、又冇分類、又冇對每件作品作出論述、冇考古報告、冇分析討論、冇歷代文獻……係乜都冇！仲要一共九百多件珍藏中只展出三百八十四件，展覽是想說服人，這些確是元代景教文物，定係加強人們的懷疑呢？

這樣Hea爆的展覽出現的話，只有兩個情況：一是負責人之專業及學術水平超低，二是有心刻意掩飾這方面研究的一貫錯誤。

到底是前者定後者呢？而且有工作人員親口同我講，他們也接受不了這般Hea的展出，連少許文字也不在實物旁作講述：「這些不是從別處借來的文物，港大收藏了幾十年，是自己東西，也像無研究過似的！」聽到職員的話，大快人心，原來博物館內還是有正常人。若然相關人士冇料，可以去請教景教研究人員，香港天主教不少神父也有對景教進行研究，請教咗他們未？