極速迎風　Ferrari California T

雖然夏日炎炎揸開篷車好似熱咗啲，不過如果拍檔係法拉利（Ferrari）嘅California T的話，感覺肯定爽晒！唔只超跑造型搶盡收視，更重要係全新嘅3,855c.c. Turbo引擎力大無窮，560hp馬力話嚟就嚟，而且只需3.6秒就做到0-100km/h，開住篷都快過人，畀着任何人坐喺駕駛席上，想唔飄飄然都難！

尾箱置物量多寡，受制於篷頂開關與否，不過放置兩、三件手提行李都不成問題。

看似簡單嘅波檔選擇鍵，留意底部設有Launch功能開關，提升駕駛樂趣。

錶板中央嘅黃色引擎轉速計固然搶眼，左面屏幕亦不容忽視，專門顯示油溫及水溫等重要數據。

充滿戰鬥氣息嘅車廂裝潢，置身其中自然想快跑番轉。

TPE系統顯示器設於中控台頂層，讓駕駛者清楚了解Turbo運作。

全新3,855c.c. Turbo引擎融入大量F1技術，令輸出數值再創新高。

前座用上賽車化桶椅，試駕車仲係繡上黃色縫線嘅醒目款式。

前後車重比例達至47:53，相當接近完美境界。

今次試車喺淺水灣與大浪灣之間嘅蜿蜒山路進行，一出發，引擎與尾喉嘅咆哮已經令人抖擻精神，筆者都忍唔住將駕駛模式由Comfort變成Sport，盡快試真California T嘅戰鬥力。雖然路試初段遇上繁忙交通，引擎只可以喺低轉速區域運作，但唔代表會同七前速F1自動波箱聯署投訴，相反以爽快敏銳嘅加速表現解決問題，大大紓緩因為塞車而引致嘅煩躁心情。之後路面暢通番，而路況變得迂迴，筆者於是加大油門力度，同時頻頻用軚環撥片轉波，將引擎轉速維持於最強輸出範圍內。

馬力劇增100hp

由於用咗Sport模式，引擎與波箱反應都極為敏銳，就算駕駛行徑變得激進，整體表現依然強勁，筆者最記得喺大潭水壩附近嘅上坡路段，路況變得狹窄、迂迴，對動力有更高要求，不過California T嘅3,855c.c. V8引擎設有Turbo關係，而且用咗新式雙渦管增壓技術，以及應用於F1賽車嘅平面型曲軸，換來比California、California 30更大嘅馬力，多咗足足100hp，就連扭力亦都高達77.0kgm/4,750rpm，段段急彎都可從容應付。

操控難以挑剔

之後與California T走入石澳道，雖然幾度想「考驗」California T，不過都只是徒然，無論踩油門嘅力度有幾大、轉波次數有幾頻密，動力依然源源湧出，未曾出現跌速嘅尷尬情況，而且底盤設計精良，配合賽車化前雙搖臂及後多連桿懸掛組合，加埋接近完美嘅47:53前後車重比例，令彎路操控更上一層樓，就算將電動硬摺頂全開，彎路功架依然出色，仲可以細聽由引擎與排氣尾喉合奏嘅雄渾交響樂，難免令人車手上身，F1 Feel爆燈！