「桃子變身！」只見桃太郎除下頭帶上嘅桃子紋章，立即喚出變身鎧甲，一個日本家喻戶曉嘅童話角色，搖身一變成為斬妖除魔嘅小英雄，這故事其實源自1991年在港播映嘅日本動畫《機甲桃太郎》。港產玩具生力軍TripleBug就爭取到《機甲桃太郎》嘅產品製作版權，炮製成合金玩具，透過裝着變身玩法加上Face-off Gimmick，集體回憶立即返嚟。

TripleBug
機甲桃太郎
$780

動畫中嘅桃太郎係「雙劍流」，隨盒自然唔少得兩把武士刀，否則如何使出「桃刀法—千劍斬」及「桃刀法—十字斬」等等嘅必殺技。

正如唔少日系Figure，TripleBug桃太郎都可以換面形式變成唔同表情。

隨盒附有猴子達達（左）、貴族狗皮皮（中）及雉雞琪琪（右），夠晒熱鬧。

劇中嘅桃太郎完成變身後，就會戴上紅面罩，胸前嘅桃字仲會發光，玩具版本就以分件呈現立體感。

學足當年Takara玩具嘅包裝方式，隨盒附有角色遊戲卡，由本港畫師操刀，增加收藏價值。

輕裝下嘅桃太郎以深藍色素體示人，老實講句，素體嘅可動性只算一般。

「我細個好鍾意《機甲桃太郎》，但係自從Takara出過合金桃太郎及金太郎後，廿幾年嚟都冇新作推出，與其等復刻，不如自己搞好過！」本身經營玩具店嘅KK，就同朋友合資傾版權，希望可以為桃太郎推出自家玩具，他坦言︰「我哋唔出名，好難向日方申請版權，好在認識到中介人，先可以搭通天地線進行磋商。」KK又指自己本身唔識造型製作，好彩有身為手機遊戲畫師嘅朋友幫忙，合力將埋藏咗26年嘅心願成真。

開山之作 標榜可動性

童年時，筆者都玩過《機甲桃太郎》嘅玩具，不過都係童友社推出嘅模型，齋啪粗玩無妨，但細緻度及可動性都難有要求。由幾位本地70至80後嘅Kidult，包括KK合組而成嘅TripleBug，便排除萬難傾掂日本官方授權，將桃太郎「重見天日」。作為玩具界初哥，今次嘅桃太郎做工可算係誠意之作，佢哋深明舊版玩具可動性低嘅問題，於是膊頭位選用可以向多方位轉動嘅Ball Joint關節，讓雙手可以喺胸前交叉，配合專用造型手掌，就可重現「桃」狀嘅可愛手勢，就連桃太郎嘅三位搞笑跟班，分別係傻頭傻腦嘅猴子達達、怕事嘅貴族狗皮皮，以及多嘴嘅雉雞琪琪都一併做埋，雖然不設可動關節，但係雕工與比例跟足原著，上色亦算精準，足以收貨。

表情豐富 含金量高

TripleBug嘅桃太郎絕非平價「全膠宴」，透過裝着變身玩法，鎧甲組件都由合金製成，胸甲、前臂、小腿及腳掌統統都係Diecast，夠晒墜手，而且白色位置用咗「珍珠白」塗裝，肚皮嘅「桃」字裙甲又用咗立體分件，設計確係一絕，就連腳面嘅蟠桃都係立體製作，背包「日本一」旗幟嘅上色又冇出界。最過癮係表情多多，透過更換磁性面相組件，就可得出微笑Look，大笑Look及熱血怒目Look三款表情，加埋變身時嘅紅色面罩，變化多端。不過有讚亦有彈，胸與腰並非獨立可動，令下身活動顯得生硬，Body嘅內部膠料又有些少粗糙，而且Ball Joint扭得多，又怕承托唔到金屬裝甲嘅重量，奉勸各位粉絲把玩時要多多「錫身」。

查詢：6376 7756

文：Alfred　攝：Man、Fanny