慳妹之選　Lexus NX300h

喜歡SUV，又怕買咗部食油怪？揀部Hybrid型號就得啦！筆者早前就試咗部凌志（Lexus）NX300h，足足試咗三日，交車時油錶顯示係14.1km/L，以目前油價計算，油費只係$1.1/km，SUV都可以慳成咁，夠驚喜未？而且貴為凌志型號，全車內外都有拍得住歐洲豪門嘅布局，事後筆者都有啲後悔，點解唔借多幾日作長測呢？

五座布局之下，車尾都有可觀置物量。

前排備有電動冷暖功能，令PatPat冬暖夏涼。

車廂空間真係有交代，睇睇後排嘅Head-room及Leg-room就知冇講假。

多得呢個大型天幕頂，令車廂感覺極盡開揚。

雙圈設計嘅儀錶板之間設有小屏幕，豐富行車資訊。

2.5L直四VVT-i引擎嘅馬力達153ps，若果電動馬達同步發功，總馬力去到197ps。

尾燈罩形狀棱角分明，與車頭、車側嘅銳利線條相呼應。

輪圈賣相充滿陽剛氣息，切合SUV嘅硬朗形象。

波棍台旁邊設有駕駛模式旋鈕及按鍵，操控起嚟就手方便。

透過中控台嘅7吋屏幕，就可了解Hybrid嘅運作情況及儲電量。

車廂布局奉行現時嘅家族式作風，豪華、實用兼備。

NX300h屬於中型SUV，力量表現當然有番咁上下，佢嘅油電混合動力布局由2.5L VVT-i引擎與電動馬達組成，單計引擎部分，已經有153ps馬力及21.0kgm扭力，加埋電動馬達嘅話，總馬力去到197ps。經過三日試車，筆者發現大部分時間力量輸出都傾向線性，即使197ps馬力唔係細數目，但係駕駛初哥都駕馭得來。印象至深係駛入新娘潭走咗一轉，該區路況出名迂迴，而NX300h嘅車身又有番咁上下大部，不過懸掛系統全程都支撐十足，而且E-CVT電子控制無段變速波箱反應敏捷，並且與Hybrid系統合拍得宜，就算應付上落坡幅較大嘅路段，以及連串S彎都唔係難事，尤其是善用加減波嘅話，更會發現操控上嘅優勢。

長開冷氣　依然慳油

NX300h備有三種駕駛模式選擇，分別係ECO、正常及動感，第二日試車，筆者就用正常模式於粉嶺區內游走，力量輸出依然線性，起步與加速反應都相當斯文；去到新界環迴公路往元朗方向，一於放膽啲，改用動感模式之後，油門反應變得敏銳直接，切線爬頭絕冇半點拖泥帶水，一字記之曰︰爽！

今次試車，三日都係喺新界行走為主，總共行咗250km左右，有言在先，天氣咁熱，長開冷氣是常識吧，筆者都好少用到ECO，故此扯高耗油量實屬難免，不過還車時油錶顯示嘅耗油量只係14.1km/L，油費只係$1.1/km，以一部車長4,630mm、車重1,835kg嘅SUV嚟講，邊仲有得挑剔？換轉係同級嘅汽油版SUV，十之八九已經冇咗半缸油了。

內外裝潢　處處講究

我認，我係港女，揀男朋友同揀車一樣，有內涵係基本要求，外在美都最好有埋囉，再貪心都好，慘得過NX300h都可以Fulfill晒我嘅要求。車身造型應用咗「Inner Bullet」設計理念，包括鬼面罩、LED頭尾燈罩及LED日間行車燈等位置，都以鋒利嘅線條組成，夠Sharp醒！車廂就有齊豪華、寬敞與舒適三大冇得輸元素，最吸引係中控台嘅7"多媒體屏幕，透過底下嘅Lexus Display Audio Controller，操控方便又直接。筆者試過滿載之下遊車河，後排坐咗三位成年男士，個個都係中等身形，都冇出現頂頭頂腳嘅問題，不過識歎指數最高嘅都係前排，既有電控功能，又有冷暖效果，大熱天時正好為椅墊降溫。車內又有觸感照明開關，唔使分心搵掣開燈，加埋特大全景觀天幕，開揚度高，唯一美中不足嘅係，爭緊個王宗堯或者周柏豪咁樣嘅男神級乘客囉。