Alcatel OneTouch Idol 3 正反雙Call

手機平時放喺褲袋、手袋，拎出嚟嗰陣，周不時聽筒位會喺下面，要上下掉番正先可以講電話。遇上急Call難免手忙腳亂，Alcatel竟然有新諗頭，新機OneTouch Idol 3特別用上「Reversible」設計，機面上下位置都設有聽筒及收音咪，機身無分上下都可以煲粥，夠晒鬼馬！

備有5.5吋屏幕，顯示質素唔錯。$1,999

機背雖然用上塑膠物料，不過加入金屬髮絲紋，設計不俗。

設有雙前置喇叭，兼且支援JBL音效。

前置鏡頭達800萬像素，而且提供人臉美化功能。

支援雙卡雙待，用上一體式卡槽設計。

原裝附送JBL耳機，提供線控，方便轉歌同埋接聽電話。

鎖頁設有多個快捷鍵，包括計數機、音樂、自拍、新增聯絡人及掃描QR Code。

預載Android 5.0作業系統，自家介面設計簡約，操作流暢。

《Facetune》提供一系列美白、濾鏡效果，執相啱用。

內置JBL《混合》App，可以將音樂玩混音效果。

拍攝介面內置HDR、全景、手動等多個模式，功能都算齊全。

Alcatel Idol系列手機設計向來都有心思，仲記得Idol Ultra玩薄切、Idol Alpha就玩閃光透明帶，花臣多多。今次Idol 3都唔例外，圓角直板機身、電鍍邊框、仿金屬髮絲機背，配合7.4mm厚度及141g之重量，手工都算精緻。另外，機面上下位置均設有喇叭，喇叭由於比屏幕稍為下陷，令機面上下恍如有個小平台，外形更見獨特。而雙前置喇叭輸出均達1.2W，更支援JBL音效，播放效果相當唔錯。仲要一讚就係原裝附送嘅耳機都係JBL出品，音質好得多。

倒轉煲粥

單靠外觀當然未夠，此機仲大玩首創嘅「Reversible」概念。有別於一般手機只備有一組聽筒及收音咪，Idol 3機面上下位置各備有一組聽筒及收音咪，用家將機身上下倒轉都依然可以擺埋耳仔傾電話，以後毋須再理會手機有冇上下掉轉。小記試玩，因為機身上下設計幾乎對稱，掉轉使用都唔會感覺奇怪，用落確實方便；留意撥號、接聽前要揀定用上或下耳筒及收音咪，唔可以邊傾邊轉。

4G加八核心

Idol 3於MWC 2015發布時，有兩個版本，分別為4.7吋及5.5吋，今次率先到港嘅就係5.5吋版本。屏幕方面，5.5吋屏幕採用IPS素材，而且解像度亦達1,080p，顯示細緻度、色彩以至可視角都不俗。至於規格，搭載Qualcomm Snapdragon 615八核心處理器，配合2GB RAM及32GB ROM，屬中階級數，美中不足係唔可以插記憶卡擴充容量。此外，Idol 3兼容4G制式之餘，亦支援雙卡雙待。