Huawei MediaPad T1　袋裝平板

好多人都想搵部平平哋兼且輕巧嘅Tablet，隨時隨地追吓劇。可惜平價平板大多都係山寨出品，冇信心是常識吧！最近國產大牌Huawei就推出MediaPad T1，屬入門級平板型號，但就用上好多網民同用家都鍾意嘅7吋Form Factor，手持、袋落褲袋都咁方便！最重要係機價超平，一千蚊有找，咁抵玩，邊度搵？

$998

備有7吋屏幕，可惜解像度僅得1,024×600。預載Emotion UI 3.0，撥頁流暢。

機背用上大幅金屬，手感一流。

機背鏡頭只有200萬像素，拍攝質素麻麻。

機面上方設有聽筒，可以擺埋耳邊直接傾電話。

支援microSD及microSIM，下載速度達21Mbps。

試玩《逐鹿三國》，載入、落指令反應都算快速，表現唔錯。

設有通話介面，操作與手機相同。

狀態欄提供大量快捷鍵，包括較少見嘅屏幕擷取、鎖定屏幕等。

內置省電模式，可以大幅延長待機時間。

雖然MediaPad T1定位入門，不過機身設計都叫落足心思，一貫嘅大路黑色機面，配圓潤邊角位，手持舒服；特別在於機背中間位置用上大幅鎂鋁合金，而機背上下嘅塑膠位置都壓上凹凸花紋，銀撞白色，都幾突出。MediaPad T1採用7吋屏幕，厚度係8.5mm，重278g，手掌唔算大都仍可以輕鬆單手揸機，攝落褲袋都話咁易。此平板喺內地嘅宣傳口號係「小平板，大手機」，亦即係代表MediaPad T1可以打電話，佢備有SIM卡卡槽，除咗支援3G上網之外，機身仲似足一般手機咁設有聽筒同埋咪高峰，擺埋耳邊直接講就得，連免提都可以慳番。

長效電量

規格方面，用1.2GHz四核心處理器，有1GB RAM、8GB ROM，明顯係屬於入門級效能，幸好運行Android 4.4系統及自家Emotion UI 3.0之下，開Apps、操作雖然唔算超爽快，但都未見有明顯遲緩。小記試玩《東網on.cc》連結的遊戲《逐鹿三國》，畫面載入、落指令都見順暢，以如此機價嘅定位嚟講，表現合格。值得一提，MediaPad T1內置4,100mAh特大電池，根據廠方數據，播放影片同埋玩遊戲時間分別可達12小時及10小時，電力相當襟用。