無論係模型或完成品，相信玩開高達有一定時間嘅朋友都會認同，就係往往收視唔多掂嘅動畫，箇中機體商品化嘅話，完成度往往有驚喜，甚至係愈畀人睇死嘅機體，Bandai偏偏愈花心機設計，務求刺激番粉絲嘅入貨意欲，咁講法，Robot魂最新推出嘅G-Self，即係《Gundam Reconquista in G》嘅主角機，又會唔會係呢條方程式之下嘅代表作呢？

Robot魂
《Gundam Reconquista in G》 G-Self
建議零售價：¥4,800

Atmospheric Pack嘅基本武器有光束步槍、盾牌及激光劍，Robot魂都統統跟齊。

飛行背包連飛翼都有大幅度嘅活動性，傳神做出一飛衝天或水平飛行嘅甫士。

面相造工富層次感，比起模型版精細得多。

「光子裝甲」既有透明甲，又有具反光度嘅銀藍色塗裝，分外悅目。

胸口兩側嘅排氣口都加咗透明件，比起模型版更有Cyber Feel。

雙腳多咗連動設計，屈膝時，大腿背部嘅外甲會上移，增加屈膝幅度。

被視為富野由悠季最後一部高達作品嘅《Gundam Reconquista in G》，成績可說是差強人意，劇情方面好多人都睇唔透，至於機設亦係彈多讚少，就連主角機G-Self，唔少人都批評面相似小丑。平心而論，筆者唔係盲撐，試想想，既然係富野老師嘅最後一部高達作品，何不玩得大膽啲？似番以前嘅高達，你又會話食老本冇新意，正如一度被列入黑歷史嘅Turn A Gundam，依家好多粉絲都幫佢平反，希望若干年後大家會放下成見，識得欣賞G-Self啦！

光子裝甲有心思

去年九月，G-Self已經推出咗HG模型版本，純粹講造工，其實已有中上水平，相隔半年有多，終於出埋完成品嘅Robot魂版本，而且同樣係大氣圈內專用型號（Atmospheric Pack），相比之下，Robot魂版本嘅完成度更高。首先喺造型方面，身形比例更加修長，而且Detail位更加講究，頭部造工更有層次感，機身表面亦有更多嘅線位，最Eye Catching係腹部、腰位、手肘、膝頭及小腿嘅「光子裝甲」，唔只與HG模型一樣用咗透明組件，而且組件底下髹咗有反光效果嘅銀藍色，比起HG純粹以貼紙了事，質感當然實在得多。

目標價$280樓下

至於可動性方面，Robot魂G-Self都勝過HG，最突出嘅地方係大腿與膝頭有連動設計，屈膝嘅話，大腿背部嘅外甲就會上移，HG就欠缺同樣設計。除此之外，腰部正面與兩側嘅裝甲都有好大嘅活動幅度，而且實淨程度超出預期，唔似以往嘅Robot魂咁易甩件。至於飛行背包除咗可以上下轉動，翼身亦可向外伸展或向內收攏，基本上機設提及嘅可動能力，都可以忠實還原出嚟。不過有讚亦有彈，首先手肘只設單關節，而肩膊又唔可以向上舉起，令可動性未盡完美，塗裝上亦有唔順眼嘅地方，就係主體嘅藍色部分只用原件示人，但係背包就有塗裝，結果令主體與背包嘅藍色部分出現鴛鴦色嘅問題，至於滲線不足嘅問題……算罷啦，Robot魂懶滲線已是常識吧！總括嚟講，Robot魂Self嘅整體質素只屬中上水平，建議零售價係4,800日圓，考慮埋目前日圓「低水」，若然售價低過$280嘅話，都可以考慮嘅。

查詢︰2433 1828（瑞華行）

文︰Dick

攝︰Kim