香港小姐首輪面試出籠，除咗十優狀元較有睇頭外，其他嘅，厚道啲講各有特色囉，或者月亮真係外國嘅特別圓，筆者就覺得睇鬼妹明星開心啲，單係一套《Avengers：Age of Ultron》（簡稱「復仇2」）就令爸打們大飽眼福，除咗女神Scarlett Johansson，仲有新一代索女Elizabeth Olsen飾演嘅紅女巫（Scarlet Witch），舉手投足都夠晒Charm！現實中冇乜可能見到真人，好彩仲有Hot Toys出咗個1/6 Figure，神似之餘仲跟埋特效組件，Come On，迷暈我吧！

HT MMS301 《Avengers : Age of Ultron》1/6 Scarlet Witch零售價︰$1,430預訂價︰$1,390推出日期︰今年第四至明年第一季＊圖片所示仍屬產品原型，與最後完成品或有少許分別。

特製火燄形特效組件，可以套入專用手掌上，留意專用手掌嘅指尖都做到半透明，與特效組件更加入戲。

隨盒附有Ultron嘅機械心臟，形狀、細節及上色絕不馬虎。

外套、連身裙、頸鏈跟到足，只係嫌胸形未夠「澎湃」，真人嘅事業線深好多喎。

唔少玩家都畀電影海報（右）呃咗，批評HT嘅紅女巫唔夠瓜子面，其實睇番冇經PS嘅劇照（左），自會發現真人嘅面形絕對冇海報咁尖，到底HT有冇「失真」，留待玩家判斷。

側面最神似

女角色一向係Figure大忌，因為面部輪廓一般較淺，但係偏偏粉絲多多，稍一不慎有少少走樣，都會畀玩家口誅筆伐。HT嘅紅女巫就冇「官圖無限美」這個光環，齋睇發相就覺得神似度一般，一塊Pizza面已經相當趕客，不過如果去Secret Base睇過試辦實物嘅話，就會得到平反，黑眼圈及深刻嘅法令紋等特徵都有，臉頰亦似番瓜子面，尤其係側面最神似，So Young Lee嘅雕工其實靠得住。真正擔心係一把又鬈又長嘅植髮，將來如何處理得貼服自然，就考玩家心思了。

火雲爪入形入格

漫畫中嘅紅女巫戰衣，同泳衣根本冇分別，電影造型就保守斯文兼合理得多，Figure亦有齊紅色仿皮外套、黑色連身裙、仿皮護腕、長筒襪及棕色中筒靴，跟埋兩條頸鏈，配飾跟到足，真係要挑骨頭嘅話，就係雙腳太瘦，胸形亦未夠突出，少咗啲線條美及「事業心」。另一方面，紅女巫擅用念力發功，HT就炮製咗兩件紅色火燄形特效組件，可以套喺專用嘅造型手掌上大擺甫士，隨盒又跟埋Ultron嘅機械心臟，重現電影尾段為死去嘅孿生大佬Quicksilver報仇一幕。

Facebook︰www.facebook.com/hottoyssecretbase

銷售點︰旺角彌敦道582-592號信和中心20樓Secret Base

查　詢：3722 3988

文︰Gilbert

（圖片由Hot Toys提供）