美國嘅電動車品牌Tesla唔只喺本土市場，嚟到香港一樣人氣高企，尤其是型格、性能與環保並重嘅四門轎車Model S，更成為唔少爸爸級車迷嘅Dream Car之選；大嗱嗱送部車畀爸爸做父親節禮物，相信非一時可做到，但係於網上有售、豐儉由人嘅Tesla生活精品，唔只容易入手，而且有型有款又實用，啱晒車迷爸爸。

無論喺美國與香港，Models S都係Tesla最深入民心嘅型號，全電動、零耗油、零廢排，夠晒環保。

衣飾類 動靜皆宜
Racing Stripe 2.0 Tee　US$32
採用由人手採摘嘅非基因改造秘魯棉製造，棉質柔軟又具韌性，而且富有光澤，據稱每次清洗過後，質料都會一次比一次柔軟，備有黑、白、灰三色選擇。

Model X Tee　US$32
雖然Model X明年先交車，不過廠方已經率先推出以Model X做生招牌嘅潮Tee，用料與Racing Stripe 2.0 Tee一樣，舒適又環保。

單車衫　US$130
除咗日常便服嘅潮Tee，Tesla亦向運動服進軍，呢款單車衫採用意大利彈性透氣速乾布料製成，加上近乎無縫嘅剪裁做法，貼身又舒適，衫腳仲有三個後袋，專門擺放水樽及隨身物品，實用性交足貨。

功能風褸　US$179
用料方面防風又防水，而衫身多處包括袋口及拉鏈，都有反光帶裝飾，正面與背面亦印有反光物料嘅Tesla字樣，喺昏暗嘅戶外環境下都易於被途人察覺。

太陽帽　US$24
款式時尚又簡約，用色以黑色為主，再以灰色縫線繡上Tesla字樣，就連帽扣都有T字形廠徽，處處凸顯品牌形象。

實用類 簡約清晰
Messenger Bag　US$72
尺寸為16×11.75×3"，備有兩個磁石小口袋，以及一個可以放置15" Laptop嘅大型拉鏈間隔，夠實用，而且正如主流嘅同類產品，採用斜孭設計，肩帶長度更可自行縮放。

手提袋　US$400
專為Model S度身設計，可以放喺頭冚下嘅儲物格內，備有黑、淺灰及黃褐色三種選擇。

Key Fob車匙套　US$30
採用與Model S座椅皮革一樣嘅材料製成，備有黑、淺灰及黃褐色三種選擇，剪裁依足Model S嘅車匙尺寸，Fit到痹！

網址：shop.teslamotors.com