大佬孝型試650S

啱啱重播完《大時代》，唔只令我哋深切體會到本地電視劇嘅「新不如舊」，其實演員方面又何嘗唔係？例如喺公仔箱久違多時嘅「大佬孝」邵仲衡（David），今次重播就令我們重新「執到寶」，原來上一代嘅演員係咁好戲！人氣急升嘅大佬孝，據知已經接咗好多電視劇、電影以至舞台劇嘅Job，呢期已經忙到氣咳，嚟緊更加周身唔得閒，想搵佢做車評人實實在在試番次車，就要把握當下了。

650S的內外設計處處有驚喜，例如尾喉嘴並非設在車身底部，而是置於車尾的正中央位置。

繼《烈火戰車》、《頭文字D》及《車手》等之後，香港影壇好耐未有以車為題嘅電影上畫，如果有片商想開拍嘅話，冇理由唔搵大佬孝囉！

錶板布局充滿戰鬥氣息，置身駕駛席上，當然躍躍欲試想快跑一趟。

乾淨利落而標榜高科技的車廂裝潢，令崇尚簡潔美的David讚不絕口。

螢幕上的「大佬孝」沉默寡言，現實中的邵仲衡卻侃侃而談，只要打開話匣子，便會談個不亦樂乎，採訪當日與小車迷煒燊，也大談650S的V8的種種性能特點。

超跑必定唔實用？咁又未必，頭冚底下還有一定的置物量，放置手袋、公事包等隨身物品都不成問題。

試車無數的David，今次試駕650S依然找到驚喜，試車過後更直言在McLaren的現役型號之中，最喜歡的便是650S。

在David的整體評語之中，650S是一款既好玩，亦能顧及日常代步需要的超跑佳作，高度User Friendly。

好多人都知邵仲衡係越野車迷，參加過比賽，又做過四驅車生意，唔少同行都搵過佢試越野車，我哋一於搞搞新意思，試超跑！藉呢次訪問，令我哋知道邵仲衡唔只係四驅專家，仲係超級車迷，而且有自己一套見解，例如細容積引擎藉Turbo去催谷性能，做到大馬力低油耗呢個新潮流，佢都好贊成，他表示︰「喺自然吸氣同Tubro引擎之間，我揀Turbo，我依家四部車都係Turbo，呢個係時代嘅象徵，應該善用依家嘅科技去輔助馬力。」今次測試嘅McLaren 650S Coupe，仲唔係佢杯茶？

最Buy簡潔美

McLaren 650S Coupe嘅3,799c.c. V8 Twin Turbo得唔得David歡心，要試過車先知，不過上車前已經睇得出David對650S嘅賣相好有興趣，訪問一開始，佢已經氹氹圈睇咗650S幾次，仲要笑晒口，上咗車就更興奮，十足細路仔遇到Dream Toy一樣，650S嘅外觀真係咁吸引？他認為：「吸引就一定啦，佢有另一套嘅設計美學，好似呢啲特別嘅形狀（車頭主線條），喺傳統嘅意大利跑車點會見到，好似係一間Studio學生嘅得獎設計作品，又明顯滲出英國Feel。」具體嚟講，車內車外又有邊個位最Eye Catching？他強調︰「冇得傾，一定係個籠，我好鍾意呢種乾淨嘅布局，唔知算唔算係後現代嘅設計呢，好平滑、好精簡，清清楚楚，有啲似Tesla（中控台顯示屏），呢種美學深得我心。」

User Friendly贏盡歡心

外在美，650S贏盡David歡心，內在美又如何？今次試車喺啟德郵輪碼頭一帶進行，既有大直路可以試到加速能力，附近亦有包括迴旋處等彎道試試攻彎功架。《大時代》中嘅大佬孝Man到震，現實中嘅邵仲衡，駕馭超級跑車亦充滿勁度，幾次加速抽頭過車話去就去，經過迴旋處又乾淨利落，冇話就住就住，David喺試車過後有以下評價︰「以超級跑車嚟講，650S的確照顧到日常代步需要，完全引證到高科技嘅表現，而且力量表現傾向線性，唔會好突兀，迴旋半徑又相當細，操控起嚟相當Predictable，唔似意大利跑車太過瘋狂，係另一種車味，非常凸顯新派嘅英國車味。」

唔只Off-road，大佬孝揸超跑一樣手到拿來，佢會唔會對大馬力車款情有獨鍾呢？凡事唔係想當然，他就話︰「我反而鍾意好靈活、馬力同各種配搭匹配嘅車，太崇尚馬力嘅車，好似美式跑車，或者好力大如牛嗰種，我感覺麻麻。呢部650S，就係一間好Descent嘅廠，喺一個好Dscent嘅態度之下，一班好Desent、好Professional嘅工人，日本就稱為Takumi，一班『匠人』製造出嚟，完成度好高，將由F1引證到嘅科技放咗落去，又成功製造到出嚟，呢部車畀到我呢種好強烈嘅感覺。」喺McLaren嘅現役型號中，David又最鍾意哪一款？他坦言︰「就係呢部650S，喺McLaren嘅整條產品線之中，650S可以日常代步，其他型號就似係純粹為Track Day而設，一年之中玩唔到幾多次，唔夠盡興囉，況且650S已經有足夠實力落Track啦！」

仔仔出車冇擔心

除咗650S氹得David咁開心，又有冇其他車款令佢印象難忘？David想當年︰「以前有過一部氣冷嘅964 Turbo，好鍾意，後嚟賣走咗先至發覺買唔番。仲有一架車仔我都好鍾意，好劃時代有自己一套，就係Suzuki Wagon R，真係好車味濃郁，好嘢嚟o架！仲有一架我好鍾意嘅四驅車，係Land Cruiser 70 Series，有一架日本版我攞去比賽，直六油渣，5,000幾、差唔多6,000c.c.，扭力強橫到呢，堪稱完全制霸！」

後生時自由自在，成家立室後嘅David，出車時使唔使以屋企人嘅意願為重要考慮？他透露︰「曾經都有段時間會o架，例如太太好鍾意典型嘅歐洲名牌，平治、寶馬、保時捷嗰啲，而考慮到小朋友，就要求載到人，舒舒服服顧到實際需要，例如七人車、Mini Van。依家就好彩啦，唔使再顧慮咁多，但係始終要人揸車，唔好車揸人，固然你要畀好多心機打理，但係唔應該時時擔心架車頭暈身慶發脾氣，我就接受唔到。」

爸爸咁鍾意車，兩個仔仔又有冇遺傳得到，甚至成為三仔爺嘅共同話題？他就話︰「興趣係有嘅，不過佢哋仲細，對汽車嘅硬知識仲未算深，喺呢個話題上，彼此之間唔算傾得多。」David嘅兩位仔仔都喺英國留學，外國生活冇車不可，大個咗真係有出車需要嘅話，David怕唔怕佢哋會太大想頭，他笑說︰「唔使擔心啦，就算佢哋想出跑車、大馬力嘅車款，當地保險都唔會批啦，喺英國買車出保險，規矩好嚴呀，有保險呢關閘咗，唔使我哋做父母嘅操心。」