早過Ultron滅世

由石之森章太郎原作嘅《大鐵人17號》，雖然已經係35年前嘅作品，但係依家睇番依然夠In。話說一班科學家為咗保護環境，於是發明咗一部超級電腦「智慧」，點知「智慧」似足Ultron，IQ爆棚之餘仲好偏激，認為人類就係導致世界末日嘅元兇，於是製造咗一個又一個嘅機械人，為「救世」而消滅人類，17號就係其中一個。奸有奸輸，同「智慧」一樣植入AI嘅17號就計算到另一個答案︰拯救世界嘅主角唔係機械人，係人類先啱，機緣巧合下遇上南三郎等地球人仲做埋Friend，於是同人類並肩作戰對付番舊波士。雖然17號係機械人，但係佢嘅AI充滿情感迴路，重友情、有正義感，故事後期更加入「18號」呢個細佬大演手足情，可惜兩兄弟為咗救人類，最後都相繼犧牲，打破咗主角打極唔會死嘅傳統外，仲令唔少小朋友睇完流眼淚。呢套劇於1977年於日本首播後，隨即喺香港分別由佳視及無綫播映，依家上YouTube仲搵到廣東話嘅OP重溫。